Tuesday, February 4, 2014

အသည်းကွဲလို့ငုတ်တုတ်



ကိုရင်သာမောင်ရေ.....ခုတော့ ရှင့်ကိုကျုပ်နားလည်ပါပြီတော်။ အရင်ကရှင် ရွာထိပ်ကညောင်ညိုပင်အောက်မှာငုတ်တုတ်ထိုင်ပြီး တငူငူတငိုင်ငိုင်နဲ့ .လူကြီးကလည်းညှင်းသိုးသိုး။ ဟိုးအဝေးကိုမျှော်ကြည့်ပြီး လူလစ်ချိန်ဆို ပါးစပ်ကလည်းတတွတ်တွတ်နဲ့ “ရီလေးရယ်ထားခဲ့ရက်လိုက်တာ။ငါ့အသည်းတွေကွဲနေပါပြီဟာ” လို့ပြောနေတာလည်းကျုပ်ကြားဖူးရဲ့တော်။

XxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxX

ရှင့်စကားကြားလိုက်ရတဲ့ကျုပ်လဲ..သစ်ပင်နောက်ကွယ်က ဗြုန်းဆိုပြေးထွက်ပြီး...“အမယ်လေးတော် ကိုရင်သာမောင်ကြီးရယ်။ ရှင့်နှယ် ..အသည်းကွဲတယ်ဆိုတာဖြစ်နိုင်ပါ့မလား။ ရှင့်အသည်းကွဲတယ်သာဆိုတယ်။ လူကြီးက လတ်လတ်ဆတ်ဆတ်ကြီးပါတော်။ မဟုတ်တမ်းတရားပြောနိုင်လွန်းတယ်” ကျွန်မ စကားကြားသွားတော့ ရှင်လည်းသူခိုးလူမိတဲ့ပုံကြီးနဲ့ အူတူတူ အမ်းတမ်းတမ်း ဖြစ်သွားပြီးမှ

“ဟဲ့..မိကြည်မ နင်ငါ့စကားဘယ်တုန်းက ခိုးနားထောင်နေသတုန်း။ ငါဖြင့်မကြိုက်ပေါင်။ ညည်းတို့မိန်းမတွေရေခပ်ဆင်းရင်ညည်းက သတင်းလွှင့်ဦးမယ်။ ညည်းနော်...ညည်း”

ဟားဟား။။ ရီဖို့ကောင်းချက်ကတော့တော်။ တော်ကြီးက ကျုပ်ကို သတ်မလိုဖြတ်မလို မျက်နှာထားကြီးနဲ့ လက်ညှိုးထိုးပြီးကြိမ်းနေလေရဲ့။ မျက်လုံးကြီးကလည်းငိုထားတဲ့မျက်လုံးကြီးလို ရဲတွတ်လို့။

“အောင်မယ်..တော့်စကားကို ကျုပ်ခိုးနားထောင်တာ မဟုတ်ပေါင်တော်။ ကျုပ်ဖာသာ ဒီသစ်ပင်ရိပ်အေးလို့ခိုဖို့
ဝင်လာပြီးဟိုဘက်မှာထိုင်လိုက်ရင်းနဲ့တော်ပြောတာကြားလိုက်ရတာ။ တော်သာ ဘာတွေဖြစ်တယ်မသိ ကျုပ်ဒီဘက်မှာ ရှိတာတောင်မသိဘူး။ ဒါနဲ့ တော့်အသည်းကွဲနေတယ်ဆိုတာ မြို့တက်ပြီးဆရာဝန်လေးဘာလေးပြဦးလေတော်။ ရွာတောင်ပိုင်းက အဘိုးမြကြီးတုန်းက အသည်းခြောက်လို့သေတာမဟုတ်လားတော့်။ ပေါ့ပေါ့လေး သဘောမထားနဲ့ဆရာဝန်ပြဦး”

“တယ်..ဒီကောင်မလေး ပေါက်တီးပေါက်ရှာနဲ့ ဘာတွေလာပြောသလဲဟ။ ငါက အဲသလိုအသည်းရောဂါမဟုတ်ဘူးဟ။ ငါ့ရီလေးက ငါ့ကိုပစ်ပြီး ခိုးရာလိုက်သွားလို့ ရူးမတတ်ဖြစ်လွန်းလို့ အသည်းကွဲတယ်လို့ပြောတာ။ ငါ့နှယ်နော် စိတ်ညစ်လိုက်တာ။ ညည်းနော်..လူကရူးချင်ချင်ဖြစ်နေတာ ညည်းက လာပြီး ဘာတွေလာပြောမှန်းမသိဘူးဟာ။ စိတ်ရှုပ်လိုက်တာ”

“ဟင်...ဟုတ်သားပဲ တော့်ချစ်သူမိရီမ တခြားယောကျာင်္းနဲ့လိုက်ပြေးတော့ တော်ကြီး တော်တော်ခံစားနေရမှာပေါ့။ အဟုတ်သား။ ကျုပ်အဲဒါကိုမေ့နေသတော်။ ဒါနဲ့ အသည်းကွဲတယ်ဆိုတာ ဘယ်လိုကြီးနေသတုန်းတော့။ ကျုပ်ကိုရှင်းပြစမ်းပါဦး” ဆိုပြီး ကျုပ်လည်းနားထောင်ဖို့ အပီအပြင်ကို မြေကြီးပေါ် ဖိနပ်ခုပြီးထိုင်လေတော့တာ။ မြို့ဈေးက ပြန်လာတဲ့တောင်းပလုံးနဲ့ ခေါင်းခုကိုလည်း အကျအနဘေးကို ချလိုက်သေးတယ်။

“အာ....နင်ငါ့ကို ဒုက္ခပေးပြန်ပြီဟာ။ ငါ့ဖာသာ တစ်ယောက်တည်းအေးအေးလူလူနေပါရစေဟာ”

“လုပ်စမ်းပါတော့ ကျုပ်သိချင်လို့ပါတော်”

ကျုပ်ပုံစံကလည်းတော်မှ မရှင်းပြရင် ငုတ်တုတ်ထိုင်ပြီး ပြောပြဖို့ တတွတ်တွတ်တောင်းဆိုမယ့်ပုံ။ တော်စိတ်မရှည်လို့ ထ ထွက်သွားရင်လည်းလိုက်မေးတော့မယ့်ပုံမို့ တော်လည်း စိတ်ပျက်လက်ပျက်နဲ့ ကျုပ်ကိုကြည့်ပြီး သက်ပြင်းရှည်ကြီး ဟင်းးးခနဲချတယ်။

“ဒီမှာ မိကြည်မ.. ညည်းဘယ်သူ့ကိုချစ်ဖူးလဲ။ ညည်းဘယ်သူ့မှ မချစ်ဖူးသေးရင် နားလည်မှာမဟုတ်ဘူး။ ညည်းချစ်ဖူးသွားရင် ငါပြောပြစရာမလိုဘဲ အလိုလိုနားလည်လာလိမ့်မယ်” ကြေကြေကွဲကွဲ အသံကြီးနဲ့တော်ပြောတယ်။

“အိုတော်..ဘယ့်နှယ်မချစ်ဖူးရမလဲတော့။ ကျုပ်အဖေတို့အမေတို့ကိုချစ်သပေါ့တော့”

“အဲသလိုအချစ်မျိုးမဟုတ်ဘူး။ ငါရီလေးကိုချစ်သလိုမျိုး”

“တော်ကလဲတော်။။ကျုပ်မှာရည်းစားသနာမရှိမှန်းသိသားနဲ့ မေးနေရသေး.ပြောမှာသာပြောစမ်းပါတော်။
ကျုပ်နေမစောင်းခင်ရွာထဲဝင်ရမှာ”

“မိကြည်မ ရာ အသည်းကွဲတာကို ဘယ်လိုခံစားရလဲဆိုတော့ငါဘယ်လိုရှင်းပြရမလဲ။ နင်နဲ့တော့ခက်တော့တာပဲဟာ။” ခေါင်းကြီးကို တဗြင်းဗြင်းကုတ်ပြီး။ “ကဲဟာ..ငါအကြမ်းဖျဉ်းပြောပြမယ်။ အဲဒိထက်တော့ ငါပိုခံစားရတယ်။ ဒါပေမယ့်နင့်ကိုငါပြန်မပြောတတ်ဘူး။ နင်နားထောင်ပြီးပြန်တော့ဟာ။ ငါအေးအေးလူလူပဲနေချင်တယ်။”

“အေးပါတော်။ ပြောမှာသာပြော၊ ကျုပ်ဘယ်သူ့မှပြန်မပြောဘူး။ နားထောင်ပြီးရင်လဲပြန်မယ်။ ကျုပ်ထမင်းချက်ရဦးမှာ”

အဝေးကြီးကို မျှော်ငေးနေပေမယ့် တော့်ကြည့်ရတာ..ဘာမှလဲမြင်ပုံမပေါ်ဘူး။

“ငါလေ ရီလေးကိုတအားချစ်တယ်။ နင်တို့တွေလဲ အသိဆုံး။တစ်ရွာလုံးလည်းသိပါတယ်ဟာ။ သူ့ကိုယူဖို့ဆိုပြီး ငါ့မှာကြိုးစားလိုက်ရတာ။ နောက်တစ်ဝါကျွတ်ရင်တော့ ငါတင့်တောင်းတင့်တယ်တောင်းရမ်းယူနိုင်ရဲ့လို့အားခဲထားတာ.။ ခုတော့ ငါ့ကိုထားခဲ့ပြီးရွာထိပ်က သူကြီးသား ထူးအောင်နဲ့ လိုက်ပြေးလေတော့ နင်စဉ်းစားကြည့်ပေါ့ဟာ။ ငါဘယ်လောက်ခံစားရမလဲလို့. ခုဆိုငါဘာဆိုဘာမှလုပ်ချင်စိတ်မရှိတော့ဘူး။ သူနဲ့ငါတို့ရဲ့ ဟိုတုန်းက ပျော်ခဲ့တဲ့အကြောင်းတွေပဲ မျက်လုံးတွေမြင်နေတယ်။ တခါတလေကျဆို့ဆို့နင့်နင့် လွမ်းလွမ်းဆွေးဆွေးကြီး။ သူ့အကြောင်းအတွေးတွေပဲ ခေါင်းထဲမှာဝင်နေတယ်။ သူ့အကြောင်းပဲတွေးနေချင်တယ်။ လောကကြီးမှာနေရတာ ဘာမှအဓိပ္ပါယ်မရှိတော့ဘူးဟာ။ ငါဘာကြောင့် အသက်ရှင်နေရသလဲ။ ငါဘာအတွက်အသက်ရှင်နေသလဲ။အဲသလိုကြီးတွေတွေးနေမိတယ်ဟာ။ပြောရမယ်ဆိုရင်အနာဂတ်ပျောက်နေသလိုကြီးပဲ။
အဲလိုခံစားနေရတယ်။ ငိုချင်သလိုဆို့ဆို့နင့်နင့်ကြီးဟ။ တခါတလေကျ အရူးတစ်ယောက်လိုပဲ အသိစိတ်တွေတောင်လွတ်ချင်သလိုခံစားရတယ်။ ခုနတုန်းက ငါပြောလိုက်သလိုပေါ့။တကယ်တော့ပုံမှန်ဆို ငါတစ်ယောက်တည်းစကားပြောပါ့မလား။ တော်ပြီဟာ။ ဒီထက်ပိုခံစားရတယ်။ဒါပေမယ့် ဒီထက်ငါမရှင်းပြတတ်တော့ဘူး။နင်ပြန်တော့ အရီးပုတို့မျှော်ရော့မယ်”

စကားတွေဆက်တိုက်ပြောပြီးတော့မောသွားသလိုနဲ့ရောယောင်ပြီး..မျက်လုံးပိတ်ကြီးနဲ့ သစ်ပင်ကြီးကို မှီချလိုက်တာ အဲဒိတုန်းက တော့်စိတ်ထဲ ငိုချင်လာလို့ဖြစ်မှာပေါ့နော်။ ကျုပ်တောင်စဉ်းစားမိသေး အသည်းကွဲတာကြီးက မလွယ်ပါလား။ကျုပ်တော့အသည်းမကွဲရဲတော့ပေါင်...လို့။

XxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxX

ခုတော့ ကျုပ်လည်းအသည်းကွဲနေရပြီတော့။ မြို့မှာအလုပ်သွားလုပ်တဲ့ ကျုပ်သူငယ်ချင်းအောင်ဒင်..ကျုပ်မှာတော့သူ့ချစ်လိုက်ရတာ။။သူကတော့ ဟိုဘက်ရွာက မြို့ကျောင်းသွားတက်တဲ့ မိသက်နဲ့ ကြိုက်နေလေသတဲ့။ တစ်ဖက်သက်အချစ်လေ...ကျုပ်ခံစားလိုက်ရတာလေတော်။ မနက်ဖြန်ကျ သူရို့မင်္ဂလာပွဲကြီး ကျင်းပတော့မှာတဲ့တော့။ ရှင်ကတော့မြို့မှာ တစ်အိုးတစ်အိမ် ထူထောင်ပြီးတော့ မိရီကို မေ့နေပြီလားမသိ။ကျုပ်ကတော့ခံစားလိုက်ရတာ အလူးအလိမ့်။လွန်ခဲ့တဲ့ ၅ နှစ်လောက်က တော်ခံစားခဲ့ရတာတွေ မရှင်းခဲ့သမျှ ခုတော့ဘွင်းဘွင်းကြီးသိပြီးလက်တွေ့ခံစားနေရပါပြီတော်။

ခုတော့လေကျုပ်လည်းတော့်လိုပဲ ရွာထိပ်မှာတငုတ်တုတ်တုတ်.........



ကြည်ဖြူပိုင်

1 comments:

Ko Zey said...

ခုတော့လေကျုပ်လည်းတော့်လိုပဲ ရွာထိပ်မှာတငုတ်တုတ်တုတ်.........း)