အခန်းထောင့်ကသစ်ပင်

  photo source:  http://fusionbonsai.files.wordpress.com/2012/01/bp16.jpg

တစ်ခုသော ညနေခင်းတွင် ကျွန်တော်သည် ပန်းတွေနှင့် သစ်ပင်များရှိရာ နေရာလေးတစ်ခုကို ရောက်သွားခဲ့၏။ သစ်ပင်တွေက စိမ်းစိုစို ပန်းတွေက အရောင်သွေးစုံလို့ စိတ်ချမ်းသာဖွယ်ပါပဲ။

မှိုင်တွေတွေ သစ်ပင်လေးတစ်ပင်အနားကို မထင်မှတ်လိုက်ပါဘဲ ချဉ်းကပ်သွားမိ၏။ ဒီအချိန်ထိ ကျွန်တော့်ရင်ထဲ မြတ်နိုးပိုင်ဆိုင်ချင်စိတ်တို့ မဖြစ်ထွန်းသေး။ ဒါပေမယ့် သစ်ပင်လေးနဲ့ ကျွန်တော် စိတ်ချင်း နီးစပ်မှုတွေ ရခဲ့တယ်ဆိုမလားပဲ။

နောက်နေ့တွေ နောက်နေ့တွေလည်း အဲသည့်နေရာကို သွားလို့ သစ်ပင်လေးကို သွားကြည့်မိတယ်။ ရင်းနှီးစိတ်တွေ အမြစ်တွယ်ခဲ့ပြီကိုး။

xxx

တနေ့တော့ သစ်ပင်လေးက ကျွန်တော့်ကို ပြောခဲ့သလိုပဲ။ : ငါမင်းကိုမြတ်နိုးတယ်။ ငါ့ကို စိုက်ပျိုးပါ။ အထီးကျန်ဆန်တဲ့ဘဝမှာ နေသားကျပေမယ့် မြတ်နိုးမိပါသတဲ့:။

သူတစ်ပါးအတွက် ဘယ်လိုနေမယ်မသိ။ ကျွန်တော့်အတွက်တော့ သစ်တစ်ပင် ထပ်စိုက်ဖို့ခက်ခဲနေပါသည်။ တစ်ပင်စိုက်လျှင် တစ်ပင်ဆိုသလို ကျွန်တော်နှင့်ထပ်တူ ရှင်သန်စေချင်နေမိတာကိုး။ 

ဒီမတိုင်မီက သစ်ပင်ပိုင်ရှင်က စိုက်ပျိုးပေးပါရန် လိုလိုလားလားတောင်းဆိုမှုများကြောင့် ကျွန်တော်သစ်ပင်တစ်ပင် စိုက်ပျိုးခဲ့ဖူးသေးသည်။ ကျွန်တော့်အတွက် မွှေးကြူလှပသော ပန်းရနံ့များနှင့် ထုံမွှမ်းစေရပါမည်။ ကျွန်တော့်စိတ်ချမ်းသာမှုမှန်သမျှကို ပွင့်သောပန်းများနှင့် ဖြစ်တည်စေရမည်ဟူသော စကားအထပ်ထပ်နှင့် သစ်ပင်တစ်ပင်ကို ကျွန်တော် ပိုင်ဆိုင်ခဲ့ဖူးသည်။ ကျွန်တော့်လက်ထဲတွင် လန်းရွှင်ခဲ့၏။ ပြောရမည်ဆိုလျှင် ထိုသစ်ပင် ကျွန်တော့်ကို စောင့်ရှောက်ခဲ့၏။ သို့သော် ပန်းပွင့်ရန်ကိုကား သူပျက်ကွက်ခဲ့၏။ ထို့ကြောင့် စိတ်မြန်လက်မြန်ရှိသော ကျွန်တော်က ပန်းပွင့်မယ်ဆိုပြီး မပွင့်တဲ့ သစ်ပင် ခင်ဗျားသာ ပြန်ယူပေတော့ဟု စိတ်ဆိုးတကြီး ပြန်ထိုးအပ်ခဲ့၏။ ကျွန်တော်ပြန်ပို့ပြီး သိပ်မကြာခင် ပန်းပွင့်လန်းလာ၏။ ပိုင်ရှင်က ပြန်ယူစေချင်၍ အကြိမ်ကြိမ်တောင်းပန် ခယခဲ့သော်လည်း ကျွန်တော်လက်မခံလိုတော့။ သေချာသည်က ထိုသစ်ပင်အပေါ် ကျွန်တော့်သံယောဇဉ် ပါးရှားခဲ့သည်ပင်။ ၀မ်းနည်းသော သစ်ပင်အတွက်ကား ကျွန်တော် မတတ်နိုင်။ 

တစ်ခါခဲမှန်ဖူးသော စာသူငယ်အဖြစ် ကျွန်တော် အချိန်ယူဖို့လိုအပ်သည်ဟုထင်သည်။

သို့သော်....

ယခုသစ်ပင်လေးအပေါ်တွင်တော့ အခါများစွာ သွားရောက်ကြည့်ပြီး သံယောဇဉ်တို့ တနင့်တပိုး တိုးလာခဲ့သည်။ ထိုသို့ဖြင့် ကျွန်တော် သစ်ပင်လေး စိုက်ပျိုးမည်ဟု နောက်ဆုံးတွင် ဆုံးဖြတ်ချက် ချခဲ့၏။ ပိုင်ရှင်နှင့်တွေ့ကြည့်တော့ ဤသစ်ပင်တွင် အပြစ်အနာအဆာလေးများရှိကြောင်း ပြောဆိုပြသခဲ့၏။ သစ်ပင်လေး ပန်းပွင့်ရန် မပွင့်ရန်လည်း မသေချာ။ ယခုသစ်ပင်သည် ပန်းပွင့်များနှင့် ငွားစွင့်ပြီး ကျွန်တော့်ကို စိတ်ချမ်းသာမှု ပေးမည်ဟု မဆိုနိုင်။ သူစိတ်ချမ်းသာသလိုသာ ရှာကြံနေမည့် သစ်ပင်မျိုးတဲ့။ ထို့ကြောင့် စိုက်ပျိုးရန် စဉ်းစားပါတဲ့။ သစ်ပင်၏ အမူအရာများကလည်း ထိုသို့နှယ်သာ သူမြတ်နိုးခဲ့သည်ဟု ပြောခဲ့သယောင်ပေမယ့် ခုတော့သူမဟုတ်သယောင် ။  ကျွန်တော်စိုက်ပျိုးမည်ဟု ဆုံးဖြတ်ချက်ကျချိန်ကျ သူ့အမူအရာများသည် ပိုင်ရှင်ပြောသော စကားများကဲ့သို့ထပ်တူပင်။ သို့သော် စူးနစ်တွယ်တာပြီး ပိုင်ဆိုင်လိုသော ကျွန်တော်. ထိုသစ်ပင်တွင် ကျွန်တော်လက်မခံနိုင်သော အပြစ်အနာအဆာများရှိခဲ့သော်လည်း  မေ့ပစ်ခွင့်လွှတ်ကာ အိမ်သို့သယ်ဆောင်ခဲ့၏။ ထို့နောက် ကျွန်တော့် အ်ိမ်အခန်းထောင့်တွင် နေရာပေး၍ အမြဲကျွန်တော်ဂရုစိုက်ဖို့ ဆုံးဖြတ်ခဲ့သည်။

xxx

ကျွန်တော်၏ အလုပ်လုပ်ချိန်၊ သင်တန်းတချို့တက်ချိန်များမှ လွဲ၍ အချိန်တိုင်းတွင် ထိုသစ်ပင်အား မြတ်နိုးမှုအပြည့်ဖြင့် ဂရုစိုက်လို့သာ နေခဲ့၏။ သစ်ပင်အတွက်သာ ကျွန်တော့်အချိန်တို့ပေးခဲ့၏။ သစ်ပင်အတွက် ကျွန်တော်အရူးအမူးဖြစ်ခဲ့၏။

ကျွန်တော့်ကို မြတ်နိုးယောင်ပြခဲ့သော သစ်ပင်လေးကို ကျွန်တော်ပိုင်ဆိုင်ခဲ့တော့ ရုံးမှပြန်ရောက်သည်နှင့် သစ်ပင်လေးအပေါ် ယုယခဲ့သည်။ အရိပ်တကြည့်ကြည့် စောင့်ကြည့်ခဲ့သည်။ သစ်ပင်လေးအတွက် နေရောင်လိုလျှင် နေရောင်ရစေဖို့။ ရေဓာတ်လိုအပ်လျှင် ရေဓာတ်ရစေဖို့ ကျွန်တော် တတ်သလောက် မှတ်သလောက်နှင့် လိုအပ်သမျှ ဖြည့်ဆည်းပေးခဲ့သည်။ သစ်ပင်လေး လန်းရွှင်နေလျှင် ကျွန်တော် ပျော်သည်လေ။ ကျွန်တော့် စောင့်ရှောက်မြတ်နိုးမှုအောက်မှာ သစ်ပင်လေး လန်းရွှင်စေလိုသည်။ အထီးကျန်ဆန်လွန်းသော သစ်ပင်လေး မဖြစ်စေရ။ သစ်ပင်လေးအတွက် ကျွန်တော် တစ်ယောက်လုံးရှိသည်။ သည်သို့သာ ကျွန်တော်ခံယူထားခဲ့၏။

xxx

အစအစ ပထမတွင် သစ်ပင်လေး ကျွန်တော့်ထံပါးတွင် ပျော်မွေ့ခဲ့ပေသည်။ လန်းဆတ်သော အမူအရာများနှင့် ကျွန်တော့်စိတ်ထင် အပြုံးများပင် လန်းပွင့်လာသလိုလို။ မင်းကိုငါမြတ်နိုးတယ်ဟု မကြာခဏ ပြောလာသလိုထင်မိ၏။ ထို့ကြောင့် ကျွန်တော်ပျော်ခဲ့သည်။ ကျွန်တော့် သစ်ပင်လေး လန်းရွှင်နေလျှင် ပြီးရော ကျွန်တော်တတ်နိုင်သမျှ လိုအပ်သမျှ လုပ်ပေးဦးမည်။ လုပ်ပေးချင်သည်။

ကျွန်တော့်သစ်ပင်လေးကို အမှန်တော့ ကျွန်တော်တစ်ဦးတည်းသာ အရိပ်ကြည့်နေချင်သည်။ သို့သော် သစ်ပင်လေး သည် သူ့သဘာဝအရ မျိုးတူ သစ်ပင်တို့အကြားတွင် စိတ်ချမ်းသာပေမည်။ ထို့ကြောင့် မျိုးတူတွေ့တိုင်း ပိုလန်းဆတ်လာတတ်သော သစ်ပင်လေးအတွက် တခါတရံ ကျွန်တော့် ဂရုစိုက်များက တိုးမပေါက်ခဲ့။ မျိုးတူများကြား ပျော်မွေ့လိုသော သစ်ပင်လေးအတွက် အပတ်စဉ် ရုံးပိတ်ရက်တိုင်း မျိုးတူများကြားသို့ သွားရောက်ပို့ဆောင်ပေးပြီးတိုင်း ပျော်ရွှင် လန်းဆတ် တက်ကြွနေခဲ့သော သစ်ပင်လေးအား တိတ်တဆိတ် သွားကြည့်ကာ ကျွန်တော်ပါရောပျော်ပေးခဲ့သည်လည်း ရှိ၏။ ကျွန်တော်နှင့် နေရသည်ထက် သူ့မျိုးတူများအကြားနေရသည်ကို လန်းဆန်းတက်ကြွပျော်ရွှင်ယောင် ပေါ်ပေါ်တင်တင်ပြခဲ့သော သစ်ပင်၏အမူအရာများကြောင့် ရင်ထဲစို့နင့် ခံစားခဲ့ရသည်များလည်းရှိ၏။ ကျွန်တော်က ခံစားချက် ပြင်းထန်လွန်းသည်ကိုး။

ထိုသို့ဖြင့် ကျွန်တော့်လက်ထဲတွင် သစ်ပင်လေးသည် ပျော်တလှည့် ညှိုးတလှည့်ဖြင့် သက်တမ်း ကြာခဲ့သည်။ သစ်ပင်လေး ကျွန်တော့် အခန်းထောင့်သို့ရောက်ခဲ့တဲ့ ရက်စွဲလေးတွေ ရောက်လာတိုင်း ကျွန်တော်က သစ်ပင်လေးကို ပြောလေ့ရှိ၏။ မင်း ကိုယ့်အခန်းကိုရောက်တာ ဘယ်နှလကြာပြီကွ။ ပျော်ရဲ့လား။ မင်းကိုတော့ မြတ်နိုးစိတ်တွေ တိုးတိုးလာတယ်။ မင်းရော မြတ်နိုးသေးလားကွ။ တွေ့စတုံးကလိုလေ။ မင်းမြတ်နိုးသေးရဲ့လား။ ညှိုးနွမ်းမနေပါနဲ့ကွာ။ မင်းကို အမြဲလန်းဆန်းနေတာပဲ မြင်ချင်တာ။ မင်းဘာလိုအပ်သလဲပြော။ ပေးဖို့အဆင်သင့်ပဲ။ ဘာလိုနေလည်း။ နေမကောင်းဘူးလား။ ဧကန္တ နေရောင်ခြည် နည်းပြန်ပြီထင်တယ်။ ဆိုကာ နေရောင်ခြည်ထဲ ချပေးဖို့လည်း မပျက်ကွက်ခဲ့။ သို့ပေမယ့် သစ်ပင်လေးက စကားပြန်မလာရုံအပြင် အမူအရာနဲ့လည်း လန်းဆန်းတက်ကြွပုံတောင် မပြတော့ဘဲ ကျွန်တော့်အခန်းလေးထဲ နေရတာ ညှိုးရော်နေသယောင်တွေ အထပ်ထပ်ပြလာတော့ ကျွန်တော်စိတ်မကောင်းဖြစ်ရသည်။

သစ်ပင်လေး ကျွန်တော့်အခန်းတွင် မနေလိုတော့ဘူးလား။

ပန်းမပွင့်ပေမယ့်၊ ကျွန်တော့်အတွက် လတ်ဆတ်ပျော်ရွှင်ခြင်းတွေ သစ်ပင်လေးက မဖန်တီးပေးခဲ့ပေမယ့် ၊ ကျွန်တော့်စကားတွေအပေါ် တခါတရံ သူလန်းဆတ်သောအမူအရာတွေနဲ့ တုံ့ပြန်ခဲ့လျှင်တောင် ပျော်ရွှင်ခဲ့သော ကျွန်တော်က ကိုယ့်ကိုယ်ကိုယ် လှည့်ဖျားကာ အရင်က သစ်ပင်လေးက မြတ်နိုးလို့ ငါ့ကို စိုက်ပျိုးစေလိုတဲ့ အမူအရာတွေပြခဲ့လို့ မြတ်နိုးတဲ့ ငါက စိုက်ပျိုးခဲ့တာပဲ။ သူ နေရောင်လိုလို့ ညှိုးငယ်နေတာ နေမှာပါ။ ရေဓာတ်များခန်းခြောက်နေသလား။ ငါဆောင်ကြဉ်းပေးဦမှ ဆိုကာ တတ်သမျှနည်းလမ်းများဖြင့် ပိုလို့သာ ဂရုစိုက်မြဲ။  ဤသို့နည်းဖြင့် ကိုယ့်ကိုယ်ကို လှည့်ဖျား၍ စိတ်မကောင်းဖြစ်လာလျှင် ထိုစိတ်တို့ကို ခပ်ဝေးဝေးသို့ မောင်းထုတ်ညာခဲ့သည်။ 

xxx

သို့ပေမယ့် သစ်ပင်လေး ကျွန်တော့်အခန်းထောင့်တွင် နေရသည်မှာ မပျော်ရွှင်ကြောင်း နှင့် မျိုးတူ သစ်ပင်တစ်ပင်နှင့် ဝေးခဲ့ခြင်းအတွက် ညှိုးနွမ်းခံစားနေရသည်မှာသေချာကြောင်း ၊ အကြိမ်ကြိမ် ကိုယ့်ကိုယ်ကို ညာနေခဲ့သော ကျွန်တော်  သိခဲ့သည်။ သို့သော် ကျွန်တော့်အခန်းထောင့်တွင် မပျော်တော့သော သစ်ပင်လေးကို မစွန့်ခွာချင်သော ကျွန်တော်၊ သစ်ပင်လေးအနား ဖက်တွယ်ကာ အရင်လိုပင် ဂရုစိုက်နေဆဲ၊ အရင်လိုပင် စကားပြန်မလာတတ်သော သစ်ပင်လေးအပေါ် မြတ်နိုးမှုစကားတွေ တတွတ်တွတ်သွန်ချနေဆဲ။ သစ်ပင်က ညှိုးနွမ်း မပျော်ရွှင်မှုနဲ့ တုန့်ပြန် ၊ ကျွန်တော်က မြတ်နိုးမှုတွေ သွန်ချ။ သည်အခြေအနေကို ကျွန်တော် ဘယ်လောက်ကြာကြာ တောင့်ခံနိုင်မှာတဲ့လဲ။

ဤသို့ ကျွန်တော့်အခန်းလေးထဲ တစ်စထက် တစ်စ တိုး၍ ခြောက်သွေ့ ညှိုးနွမ်းလာတဲ့ သစ်ပင်လေးရဲ့ မပျော်ရွှင်မှုကို ကျွန်တော်ကြာတော့ မကြည့်ရက်တော့။ ကျွန်တော့်ရဲ့ မစွန့်လွှတ်လိုတဲ့ တွယ်တာမြတ်နိုးစိတ် ကြီးလွန်းတဲ့ နှလုံးသားရဲ့ အစွဲအလန်းကြီးစွာ ခံစားနေရမှုကိုလည်း မကြည့်ရက်တော့။ နောက်ဆုံးမှာတော့ ကျွန်တော့်ကို စွန့်ခွာသွားလိုတဲ့ သစ်ပင်လေးအတွက် လွတ်မြောက်ရာလမ်းကို ကျွန်တော် ရွေးချယ်လိုက်ပါသည်။

ကျွန်တော့် သစ်ပင်လေး သွားချင်တဲ့အရပ်ကိုသွားပါတော့။ ကျွန်တော့် ဂရုစိုက် မြတ်နိုးခြင်းတွေအောက်မှာ မပျော်လို ၊ ဆက်လက်ရှင်သန်ကြီးထွားခြင်း မပြုလိုတော့တဲ့ စွန့်ခွာလိုတဲ့ သစ်ပင်လေး ပျော်ရာနေရာမှာ ပျော်သလို ရှာကြံနေပါစေတော့။

ဤသို့ဖြင့် ကျွန်တော့်ခံစားချက်ကို ကျွန်တော် စတေးကာ သစ်ပင်လေးအား မူလသယ်ဆောင်လာခဲ့ရာမျိုးတူ သစ်ပင်ရှိရာအရပ်သို့ ကျွန်တော် ပြန်ပို့ပေးခဲ့သည်။

သို့ပါသော်လည်း မာန်ဝင့်တဲ့ မျိုးတူ သစ်ပင်ကြားမှာ ကိုယ့်ကိုယ်ကိုယ် စောင့်ရှောက်နေဖို့၊ ဘာမဆိုတောင့်ခံနိုင်ဖို့နဲ့  ပိုင်ရှင်က ကျွန်တော့်လို သစ်ပင်လေးအပေါ် တယုတယ စောင့်ရှောက်ခြင်းမရှိလျှင် မိမိကိုယ်ကို ရပ်တည်ဂရုစိုက်ဖို့ ၊ အထီးကျန် ၀မ်းနည်းခြင်း ဖြစ်တည်လာလျှင် လွတ်မြောက်စေဖို့ အကြောင်းတွေ တတွတ်တွတ် မှာကြားရင်း ကျွန်တော့်အတွက် ဘာစကားမှမဆိုသော ကျွန်တော့်အတွက် လတ်ဆတ်ခြင်းတွေ မပြတော့သော သစ်ပင်လေးကို မူလနေရပ်သို့ ကျွန်တော် ပြန်လည်ပို့ဆောင်ခဲ့ပါသည်။

xxx

ခုတော့ သစ်ပင်လေးနေခဲ့သော ကျွန်တော့်အခန်းထောင့်သည် ညှိုးငယ် ၀မ်းနည်းစွာဖြင့် ကွက်လပ်လေးဖြစ်လို့နေသည်။ ထိုအခန်းထောင့်တွင် မနေလိုတော့သည့် သစ်ပင်လေးကတော့ မြတ်နိုးမှုတွေ သွန်ချနေသည့် ကျွန်တော့် ဂရုစိုက်မှုများမှ လွတ်မြောက်၍ မျိုးတူသစ်ပင်ဆီသို့ သွားနိုင်မည် ဖြစ်သောကြောင့် ပျော်မွေ့နေမည်လား။ ကျွန်တော် မသေချာ။ 

သစ်ပင်စိုက်ပျိုးလျှင် ကျွန်တော်နှင့်အတူ ရှင်သန်လန်းဆတ်စေလိုသောကျွန်တော့် စိတ်နှင့် ၊ ညှိုးရော်ခြောက်သွေ့လျက် ကျွန်တော့်အား နှုတ်ဆက်စကားပင် မဆိုလေခဲ့သော၊ ကျွန်တော့် မြတ်နိုးမှုတို့ ပုံနှင်းအပ်ခံခဲ့ရသော သစ်ပင်လေးအား မြင်ယောင်ပြီး နောင်တစ်ကြိမ် သစ်ပင်စိုက်ပျိုးဖို့ ကျွန်တော်ကြောက်ရွံသွားပါသည်။ 

ခု …..ညှိုးရော်ဝမ်းနည်းနေသော ကျွန်တော့် အခန်းထောင့်တွင် ကွက်လပ်။ မြတ်နိုးခဲ့သော ကျွန်တော့် ရင်ထဲတွင် သစ်ပင်လေးအတွက် ခံစားချက်တွေ ပြည့်ကြပ်။

ကြည်ဖြူပိုင်

၈-စက်တင်ဘာ-၂၀၁၃

နေ့လည် ၁၂ နာရီ ၄၅ မိနစ်

Read More

ဖေ့စ်ဘုတ်နဲ့ အေးတုတ်

(၁)

ကိုထွန်းမောင်ကျောပြင်ကို ကြည့်ပြီး မခင်မေတစ်ယောက် သက်ပြင်းတချချ မျက်စောင်းတထိုးထိုးရှိနေသည်။ ကိုထွန်းမောင်သာ အရင်လို သူမကို ဂရုတစိုက်ရှိခဲ့လျှင် ဤအဖြစ်ကို သိပေမည်။ ခုတော့ သူမတစ်ယောက်တည်းသာ ကျိတ်ခံစားနေရသည်ပေါ့။

ကိုထွန်းမောင်ကြီးကတော့ ထိုအဖြစ်ကိုမသိ။ ဖေ့စ်ဘုတ်ကိုသာ သည်းသည်းမည်းမည်းကြည့်နေသည်။ သူမဆီက လှုပ်ရှားသံသဲ့သဲ့ကြားလျှင်တော့ သူမ,မမြင်ရစေရန်  စာမျက်နှာကို အောက်ချထားတတ်သည်။ ထိုသို့လုပ်လေ သူမက အသည်းယားလေပင်။ ဘယ့်နှယ် လင်မယားချင်းပဲ။ သူသာရိုးသားလျှင် ဘာမှကွယ်ဝှက်ထားစရာမရှိ။ ခုတော့ သူမအနားလာမှာပဲကြောက်နေရသေး။ ခက်ပါသေးတယ်လေ။ သည်ယောက်ျားနဲ့တော့။

“အကို မအိပ်သေးဘူးလား။ ၁၁ခွဲနေပြီလေ။ မနက်ကျ အစောကြီးထပြီး အလုပ်သွားရဦးမှာ။ ပိတ်ရက်ကျမှကြည့်ပါလား။ လာ…အိပ်ကြစို့နော်“

“အင်းပါကွာ…အိပ်မှာပါ။ မင်းအရင်အိပ်နှင့်။ ကိုယ်ဒီမှာအလုပ်ကိစ္စ အီးမေးလ်စစ်စရာရှိလို့။“

အမလေး….အလုပ်ကိစ္စတဲ့.. ယုံချင်စရာ ခပ်ဟုတ်ဟုတ်ပဲ။ ခုနကပဲ ကောင်မလေးတစ်ယောက်ပုံကို လက်မထောင် (like) လုပ်ပြီးချိန်မှာ သူမအသံကြောင့် ဖျတ်ခနဲ ပိတ်ပစ်လိုက်တာ မသိတာလိုက်လို့။

တွေးရင်းနဲ့ ဒေါသနှင့်အတူ ၀မ်းနည်းမှုစွက်လာတာကြောင့် နှုတ်ခမ်းလေးတင်းတင်းစေ့ ကိုက်လိုက်ကာ သူ့ကို ကျောခိုင်းပစ်လိုက်သည်။ ဒီထက်ဆက်၍ “လာပါ။ အိပ်ပါဆို။ ရှင်ကအလုပ်သွားရမှာမို့ မေက ရှင်အိပ်ရေးမ၀မှာစိုးလို့ ပြောနေတာရှင့်“ လို့အထွန့်တက်လျှင် ကိုယ်တော်ချောက အိပ်ယာပေါ်သို့ ခပ်ဆောင့်ဆောင့်ဝင်ရောက်ပေလိမ့်ဦးမည်။ သည်တော့မပြောတာပဲကောင်းတယ်။

အိပ်ယာထဲရောက်တော့လည်း တော်တော်နဲ့မအိပ်တတ်။ အိုင်ဖုန်းကို လက်ထဲကိုင်လို့ ပက်လက်ကြီးကနေ ဖုန်းမျက်နှာပြင်ကို လက်နဲ့ပွတ်ဆွဲလို့ ဓာတ်ပုံတွေလိုက်ကြည့်ပြီး လှတပတလေးများတွေ့လို့ကတော့ လက်မတစ်ချက်လောက်တော့ အသာလေးထောင်လိုက်သေးတာ။

သူမက မတော်တဆများသူ့ဖက်လှည့်လိုက်လို့ကတော့။ ဖုန်း ပါဝါ ကိုပိတ်လို့ အိပ်ယာဘေးက စားပွဲပေါ်တင်ပြီး အိပ်ဖို့အရေးကြီးသယောင်လုပ်ပစ်တတ်တာမို့ ခင်ပွန်းသည် အိပ်ရေးပျက်မှာစိုးတာနဲ့ပဲ စကားမပြောဖြစ်ခဲ့။ သည်တော့ ပြန်စဉ်းစားကြည့်လျှင် သူအလုပ်ကပြန်ရောက်ချိန် သူမပြင်ဆင်ပေးတဲ့ ထမင်းကို ဖုန်းကနေ သတင်းဖတ်သလိုလို သီချင်းကြည့်သလိုလိုနှင့် စားမည်။ သူမက စကားစမြည်ပြောလျှင်တော့ “အင်း…“ အေး..“ စတဲ့ စကားလုံးရေလိုက်ငါးလိုက်များနှင့် ညစာထမင်းကို စိတ်မပါတပါ စားမည်။ လင်မယားရယ်လို့ ပြောကာဆိုကာ စားကာသောက်ကာနှင့် စကားစမြည်ပြောချိ်န်မရှိ။စားသောက်ပြီးပြန်တော့ ကွန်ပျူတာရှေ့ ငုတ်တုတ်ထိုင်ကာ အီးမေးလ်စစ်သလိုလို၊  မြန်မာပြည်ကသတင်းတွေသိဖို့ရန်အတွက် အွန်လိုင်းဂျာနယ်တွေဲဖတ်သလိုလိုနှင့် ၀ဘ်ဆိုက်တွေဖွင့်ထားသည်။ ပြီးလျှင်တော့ သူ့ရဲ့အဓိက ကျင်လည်ကျက်စားလေ့ရှိသည်က ဖေ့စဘုတ်။

(၂)

ဖေ့စ်ဘုတ်အကြောင်းကို အရင်ကတော့ မခင်မေ သိပ်မသိခဲ့။ သူ့သူငယ်ချင်းတွေနဲ့ အပြင်လျှောက်လည်ကြလျှင် တခါတရံ အုပ်စုပုံလေးများရိုက်ကြသည်။ ထိုအခါတွင်တော့ ကင်မရာကောင်းကောင်းပါသောသူက ဓာတ်ပုံများရိုက်ပေးပြီး. ….“ညကျရင်မင်းတို့လင်မယားကို ငါတဂ်လိုက်မယ်နော်“ ဟုပြောကာ လမ်းခွဲသွားကြစမြဲ။ ထိုစကားကို ကြားဖန်များလာတော့ သူမကသိချင်လာလို့ ကိုထွန်းမောင်ကို မေးခဲ့သည်။ “ အကို သူတို့က မေတို့ကို ဘာတဂ်မှာလည်း။ ဘာပြောသွားတာလည်း။“  ထိုစဉ်တုန်းက(မှတ်မှတ်ရရ၂၀၁၀လောက်ကပေါ့) သူလည်း ဒီလောက်ကြီး တွင်တွင်ကျယ်ကျယ်မသုံးသေး။ “အေးပါ..ညကျရင် ဖေ့စ်ဘုတ်  ဖွင့်ပြီးရင်ပြမယ်“ ဟုပြောခဲ့တော့ ညဖက်သာရောက်ချင်ခဲ့မိသည်။

ညဖက်ရောက်တော့ အကို့နားကပ်ခါ နေ့ခင်းကရိုက်ထားခဲ့သည် ဓာတ်ပုံများကို ကွန်ပျူတာ ဖန်သားပြင်မှာ မြင်ရတော့ ပျော်လိုက်တာ။ သူများတွေက မှတ်ချက်တွေရေးထားတာလိုက်ဖတ်ပြီးတော့လည်းတပြုံးပြုံး။ အကိုကတော့ အဲ့တုန်းကဘာမှ မရေးသလို like လည်းမလုပ်ခဲ့။ ပြောရရင်တော့ ဖေ့စ်ဘုတ်ရည် မလည်သေးဘူးပေါ့။

သည့်နောက်ပိုင်းတော့ သူမလည်း အိမ်မှုကိစ္စတွေ။ အချိန်ပိုင်းအလုပ်တွေနှင့် မအားလပ်နိုင်ဘဲ ဖေ့စ်ဘုတ်အကြောင်းကို စိတ်ကူးထဲတောင်မရှိခဲ့။ နိုင်ငံခြားရောက်နေလို့ အင်တာနက်အလွယ်တကူရသော်လည်း ရှားပါးလှသော အချိန်များကြောင့် နေ့စဉ်ရက်ဆက်လည်း အင်တာနက်မသုံးဖြစ်ခဲ့။ ခုတလော၂၀၁၂လေးကမှ အိမ်ထောင်သက် ၃နှစ်အကြာအတွင်း သူ့သူငယ်ချင်းတစ်ယောက် အလှူကို သွားတော့မှ ဇနီးဖြစ်သူမနွယ်နှင့် အမျိုးသမီးချင်း အေးအေးဆေးဆေး စကားပြောဖြစ်ရင်း ငယ်ပေါင်းကြီးဖော်လိုခင်မင်ခဲ့သည်။ အိမ်ချင်းလည်း သိပ်မဝေးလှတာမို့ တခါတရံ ရပ်ကွက်ဈေးသို့ တပတ်တခါ ဟင်းစားအတူထွက်ဝယ်ဖြစ်ကြသည်။ မနွယ်က ချောမောလှပကာ အပြောကောင်းသူတစ်ယောက်ပါပေ။

(၃)

တစ်ခုသော နေ့လည်ခင်းတွင် ၀က်အူချိုနှပ်ကြိုက်သော လင်တော်မောင်အတွက် ၀က်အူကို အကျအနနှပ်နေခိုက် ဖုန်းဝင်လာခဲ့သည်။ နံပါတ်ကိုကြည့်လိုက်တော့ မနွယ်ဆီမှ…

“မေရေ….စကားပြောလို့ရလား။ အလုပ်တွေရှုပ်နေလား။“

“ရပါတယ်..မနွယ်.. မေ ၀က်အူနှပ်ထားတာ မီးအေးလေးနဲ့ထားခဲ့ရုံပဲ။ ရတယ်…ပြော…မနွယ်။ မေ ဘာကူညီရမလည်း“

 “နွယ့်ကို ကူစရာမလိုပါဘူးမေရယ်။ မေ့ကို ပြင်ပြင်ဆင်ဆင်လေးလည်းနေဦးလို့ နွယ်ပြောချင်လို့။ ၀ိတ်လေးဘာလေးလည်းလျှော့ဦး။ နွယ်ခု အလှပြင်ဆိုင်သွားမလို့ လိုက်ခဲ့ပါလား။ ဟင်းအိုးကျက်ပြီဟုတ်“

“ဟုတ်…ကျက်ပြီမနွယ် ဒီနေ့အလုပ်သွားစရာမလိုဘူးဆိုတော့ မေ ရေချိုးပြီးတာနဲ့ထွက်လာရင် ဖုန်းခေါ်လိုက်မယ်နော်“

“အိုခေ…မေရေ. …နွယ်…စောင့်နေမယ်“

မနွယ်နဲ့ စကားပြောအပြီး ဖုန်းချပြီးတာနဲ့ ဟင်းအိုးလေး မီးပိတ်ကာ ရေချိုးခန်းခန်းထဲသို့ ၀င်ခဲ့သည်။ ရေချိုးခန်းထဲမှ မှန်ထဲတွင်တော့ ချစ်ခင်ပွန်းအတွက် ဟင်းချက်ရင်း မီးဖိုမှ အပူငွေ့ရိုက်ထားတဲ့ အဆီပြန်မျက်နှာနှင့် မခင်မေကို မြင်ရသည်။ ဆံပင်များကလည်းအနည်းငယ် ဖရိုဖရဲ နိုင်နေသည်။ မှန်ထဲမှ ရုပ်သွင်ကို မြင်လို့ အနည်းငယ် စိတ်သက်သာရာရစေရန်အတွက် ကိုယ် ကိုယ်တိုင်ပဲ ပြုံးပြလိုက်သည်။ ဒီလို ဆိုတော့လည်း ဘယ်ဆိုးလို့တုန်း…ပါးချိုင့်လေးနဲ့ဟုတွေးကာ အသံထွက်ရယ်မောရင်း သီချင်းတအေးအေး နှင့် ရေချိုးခြင်းအမှုကို စတင်တော့သည်။

ပြီးတော့ သနပ်ခါးခပ်ပါးပါးလူးကာ ခပ်ချောင်ချောင်ပွပွအင်္ကျီလေးကိုကောက်စွပ်လိုက်သည်။ နှုတ်ခမ်းအဆီဖျော့ဖျော့လေးဆိုး။ ဆံပင်လေးကို သပ်ရပ်စွာဖြီးသင်လိုက်ပြီး… ဂျင်းပန်န်တစ်ထည်ကောက်စွပ်ကာ။ဘာဒေါက်မှမပါသည့် ခပ်ရိုးရိုး ထိပ်ပိတ်ဖိနပ်လေးစီးလို့ မနွယ်ကို ဖုန်းခေါ်လိုက်၏။

“မနွယ်ရေ…မေထွက်လာပြီနော် …မနွယ်လည်းတိုက်အောက်ကိုဆင်းခဲ့တော့“

ထို့နောက် အိမ်သော့။ ထီး။ ဘဏ်ကဒ်။ ရထားစီးကဒ် နှင့် ပိုက်ဆံအိတ်သေးသေးလေးကို ထည့်ဖို့ ဆလင်းဘတ်အိတ် အလတ်စားလေး လွယ်ကာ ပေါ့ပေါ့ပါးပါး စတိုင်လ်နှင့်ပဲ အ်ိမ်ကထွက်ခဲ့လိုက်သည်။

မနွယ်တို့ တိုက်ဖက်ကို လမ်းလျှောက်သွားခိုက် မနွယ်ကလည်း တိုက်အောက်ရောက်ပြီမို့ ရထားဂိတ်သို့ အတူလျှောက်ခဲ့သည်။လမ်းအတူလျှောက်ရင်းမှ မနွယ်က သူမကိုခြေဆုံးခေါင်းဆုံးကြည့်သည်။

“တကယ်တော့ ငါ့ညီမလည်း သေချာကြည့်ရင် မဆိုးပါဘူးဟယ်။ ပြင်ပြင်ဆင်ဆင် မနေလို့သာပဲ။ မဖြစ်ပါဘူး စတိုင်လ်လေးတော့ နည်းနည်းဖြစ်ဖြစ်ပြောင်းပေးမှဖြစ်မယ်။ နို့မိုဆိုရင် ငါ့ညီမစိတ်ဆင်းရဲရလိမ့်မယ်“

“ဟမ်….မနွယ်စကားကအဆန်းပါလား။ မေကဘာလို့စိတ်ဆင်းရဲရမှာလည်းဟင်“

“ဒီလို…မေရေ… မေကဘယ်လိုခံစားရမယ် မကျိန်းသေပေမယ့် မနွယ်ကတော့ ကိုယ်မဟုတ်တဲ့ တခြားအမျိုးသမီးတစ်ယောက်ကို ခဏခဏ သွားဂရုစိုက်နေရင်တော့ ရိုးသားတယ်ပဲပြောပြော စိတ်မချဘူးတော်ရေ..မနာလိုဘူး…“

“အင်းပေါ့….မနွယ်ရဲ့ မေ ဆိုရင်လည်း အဲ့လိုပဲခံစားရမှာပေါ့။ ဟိုးရှေးရှေးကတည်းက ကိုယ့်ချစ်သူ ကိုယ်နဲ့တွဲသွားတုန်း တခြားကောင်မလေးကို ကြည့်ရင်တောင် စိတ်ဆိုး စိတ်ကောက် ၀န်တိုကြရတဲ့သာဓကတွေရှိတာပဲကို။ ခုဟာက အဲ့လိုသွားဂရုစိုက်နေရင်တော့ ရိုးသားတယ်ပြောလည်း စိတ်ဆိုးမှာပဲပေါ့ မနွယ်ရဲ့“

“အင်း….ကျုပ်တို့ကအဲ့လို စိတ်ဆိုးပြန်တော့ ကိုယ်တော်ချောတို့က ကျုပ်တို့ကို သဘောထားမပြည့်ဝဘူး..ဘာညာနဲ့ စကားလုံး ခပ်ကြီးကြီးတွေနဲ့စွပ်စွဲကြသေးတာ.။ ကျုပ်တို့ဖက်ကခံစားချက်လည်း ထည့်မှမတွက်ကြပဲကိုး။ ခုဟာက ရည်းစားအဆင့်ဆို စိတ်ဆိုးလို့ထားခဲ့လိုက်ရလို့လည်းကိစ္စမရှိဘူး။ အိမ်ထောင်သည်ဖြစ်ရင်တော့ ကျုပ်တို့ခံစားချက်ထည့်တွက်ပြီး…နည်းနည်းတော့ ဆင်ခြင်သင့်တာပေါ့နော်။ အရမ်းကြီးရင်းနှီးတဲ့ ပြောမနာ ဆိုမနာငယ်ပေါင်းကြီးဖော် သူငယ်ချင်းမို့ မိန်းမက စိတ်ချနိုင်တဲ့အထဲကဆိုရင်တော့ တမျိုးပေါ့..ခုတော့ဘယ်တုန်းက သူငယ်ချင်းဖြစ်လိုက်မှန်းမသိတဲ့ ပြီးတော့ ကိုယ့်မိန်းမက, မမြင်ဖူးတဲ့သူဆိုရင်တော့ ကိုယ်တော်ချောတို့ မလွဲမသွေကို ဆင်ခြင်သင့်ပါတယ်လေ“

“အင်း…ဟုတ်တယ်…မနွယ်ရဲ့…ဒါနဲ့ မေကဘာလို့စိတ်ဆင်းရမယ်ဆိုတာပြောဦးလေ“

“ကိုထွန်းမောင်နဲ့ မေနဲ့က ဖေ့စ်ဘုတ်မှာ သူငယ်ချင်းမဟုတ်ဘူးလား“

“ဟုတ်ပါဘူးမနွယ်ရယ်။ မေ မှ ဖေ့စ်ဘုတ်မသုံးတာ။ ဘာလို့လည်းဟင်“

“ထူးတော့ပါဘူး။ မေလေးက အိမ်ထောင်သည်ဆိုတော့ ကိုယ့်ယောက်ျားအကြောင်း အကုန်သိသင့်တယ်ထင်လို့ မီးဆိုတာ မလောင်ခင်တားရအောင် နွယ်ပြောလိုက်တော့မယ်။ ဒါပေမယ့် သူ့ကိုတော့ ဘာမှသွားမပြောနဲ့ဦးနော်။ ကိုယ့်ဖက်ကအခြေအနေကို ပိုင်မှ ဖျောင်းဖျောင်းဖြဖြပြော။ ၀ူးဝူးဝါးဝါးသွားမလုပ်နေနဲ့ဦး။ သူ ဖေ့စဘုတ်မှာကောင်မလေးတစ်ယောက်ကို စိတ်ဝင်စားနေပုံပေါက်တယ်။ နွယ်လည်းအစကတော့ သတိမထားမိဘူး။ နွယ့်အမျိုးသားနဲ့ သူနဲ့ကသူငယ်ချင်းဆိုတော့ တခါတလေ အမျိုးသားအကောင့်ကိုဖွင့်ရင်းနဲ့ မြင်ရတယ်။ နွယ်နဲ့တော့ သူငယ်ချင်းမဟုတ်လို့ နွယ့်အကောင့်ကနေတော့မမြင်ရဘုး။ တခါတခါကျ သူဂရုစိုက်လွန်လွန်းလို့ နွယ်က မေ့အစားကြားထဲက ဒေါသထွက်လို့ပြောတာညီမရေ။ ငါ့ညီမလည်း ပြင်ပြင်ဆင်ဆင်နေဦး။ ခုလည်းကြည့်…ထွက်လာတဲ့ ဗိုက်ခေါက်ကိုတော့လျှော့မယ်မကြံဘူး။ လွယ်ရာပဲ ဗိုက်ဖုံးတဲ့ အကျီအပွဝတ်လာတယ်။ ဒီနေ့တော့ မရွှေခင်မေကို ဒီဇိုင်းပြောင်းမှကိုဖြစ်မယ်…နော်။“

“ဟုတ်..မနွယ်“

မနွယ်ကို အလိုက်သင့်ပြန်ပြောလိုက်ရင်း အလှပြင်ဆိုင်သို့ ၂ယောက်သားချီတက်ခဲ့ကြသည်။

အလှပြင်ဆိုင်ရောက်တော့ ကောင်မလေးတစ်ယောက် မျက်ခုံးမွှေးပုံဖော်ခံနေရင်း ဖုန်းကင်မရာနှင့် သူ့ကိုယ်သူဓာတ်ပုံရိုက်လိုက်သည်။ ထို့နောက် ချက်ခြင်းပဲ ဖေ့စ်ဘုတ် ပေါ်တင်လိုက်ပုံရပါသည်။ မကြာလိုက်ပါ။ ဒေါသတကြီးနှင့် သူ့သူငယ်ချင်းကိုလှည့်ပြောသည်။ “ဒင်းက ဟိုကောင်မလေးကျတော့ like လုပ်တာချက်ခြင်း။ မန့်ရင်မြန်သလားမမေးနဲ့။ ကြည့် ….ငါ့ပုံတင်တော့ နှာစေးချင်ယောင်ဆောင်နေတယ်။“

နားထောင်နေတဲ့တစ်ယောက်က ပြန်ပြောသည်။ “သူ like မလုပ်လည်းဘာအရေးလည်းဟ၊နင့်မှာအားပေးမယ့်လူတွေမှပြည့်လို့“

“like စေချင်လို့မန့်စေချင်လို့ပြောတာမဟုတ်ဘူးဟဲ့။ သူအချိုးတွေပြောင်းနေတာ ကြာလာလို့ငါတကယ်ကို တင်းလာပြီ။ ဟိုကောင်မလေးကလည်း သူ့တင်သမျှ like ဖို့ ကန်ထရိုက်ဆွဲထားတာလေ။ အပေးအယူတွေတည့်လို့။ ငါ့ဝေါလ်ပေါ်မှာ သူကောင်မလေးကို like ထားတာတွေမှပြည့်လို့။ သူ့ကိုအပြတ်ပြောလိုက်တော့မယ်။ နောက်တခါ သွားမန့်တာ like တာတွေ့လို့ကတော့ ကျုပ်ကိုသာဖြတ်လိုက်တော့လို့။ သည်းညည်းမခံနိုင်တော့ဘူး။..တကယ်ပဲ။“

တဖက်ထိုင်ခုံမှာ ဆံပင်ညှပ်ခံနေသည့် မနွယ်က ကဲ….ကြားစ….အဲ့လိုလေးတွေရှိတတ်တယ်… ဆိုတဲ့ အထာနှင့်မျက်စပစ်ပြသည်။ အပြန်ကျတော့လည်း ဒီနေ့ကစ ဖေ့စ်ဘုတ် သုံးပြီး ကိုထွန်းမောင်ကို checking လိုက်ဖို့အကြောင်း။ ကိုယ့်ကိုယ်ကို ပြင်ပြင်ဆင်ဆင်နေဖို့အကြောင်း. တော်ကြာ မျက်လုံးပြူး…ပါးလေးဖောင်းလို့ လက်ညှိုးလေးထောက်ထားသူနောက် ပါသွားမှ စိတ်ဆင်းရဲနေရမှာ မလိုလားကြောင်းတတွတ်တွတ်မှာသွားလေ၏။

(၄)

ထိုအချိန်မှ စ၍သူမအတွေးတွင် တွေးစရာ အကြောင်းအရာတွေ တိုးလာခဲ့သည်။

အကို။ ဖေ့စ်ဘုတ်။  အမျိုးသမီးလှတပတလေးများ…။ကွန်မန့်။ လက်မထောင် ……. စသည့်အကြောင်းအရာများ။

အိမ်ရောက်တော့ ရေမိုးချိုးအလှပြင်ပြီးတာနဲ့ သူပြန်လာချိန်နီးပြီမို့ ဟင်းအိုးနွှေးရင်း စောင့်နေလိုက်သည်။

သူပြန်ရောက်လာတော့ ရေချိုးဖို့ ရေချိုးခန်းဖက်ထွက်လာရင်း… “ဟားးးး မွှေးလိုက်တာ မိန်းမရယ်။ ဘာတွေများချက်တုန်း“

“အကိုကြိုက်တဲ့ ၀က်အူနှပ်။ ရေချိုးပြီးစားဖို့အဆင်သင့်ပြင်ထားလိုက်တော့မယ်နော်“

“သိပ်ကောင်းတဲ့အစီအစဉ်ပါပဲခင်ဗျာ“

ပြောပြောဆိုဆိုနဲ့ ရေချိုးခန်းထဲဝင်သွားသောသူ့ကိုကြည့်ကာ အတွေးက ၀င်လာပြန်သည်။ ဖေ့စဘုတ်……

ဒီနေ့ကစလို့ မေ…အကို့ကိုစောင့်ကြည့်နေပြီ အကို….ဟုတေးထားရင်း သူလုပ်လုပ်သမျှ မသိမသာလေးတွေ အကုန်သတိထားကြည့်မိသည်။ အရင်ကတော့ စားသောက်ပြီး သူလည်းလုပ်ချင်ရာလုပ်.။ ကိုယ်လည်း ကိုယ့်အာရုံနှင့်ကိုယ် အိမ်မှုကိစ္စတွေ အလုပ်ကိစ္စတွေနဲ့ သူ့ကို စောင့်မကြည့်အား။ ခုတော့ သူက စောင့်မကြည့်လို့ကိုမရတော့။ စောင့်ကြည့်ရန်စာရင်းထဲက နံပါတ် ၁။

ထမင်းစားနေရင်း မျက်လုံးစွေကြည့်လိုက်တော့ အိုင်ဖုန်းလေးရဲ့မျက်နှာပြင်ကို အထက်အောက်ပွတ်ဆွဲရင်း စိတ်ဝင်စားနေသည်။ တခါတရံကျတော့ ပြုံးလို့။

“အကို မေဒီနေ့ဆံပင်ညှပ်ထားတာလှလား။“ ဖုန်းလေးကိုလက်ထဲကိုင်ထားရင်းက မော့ကြည့်လာသည်။

“ဟုတ်သားပဲ ငါ့မိန်းမ ဆံပင်တွေညှပ်ထားတာပဲ.ကောင်းပါတယ်ကွာ။နည်းနည်းပိုလှလာတော့၊၀ပြီး ဗိုက်ခေါက်လေးထူနေတာတောင် မသိသာတော့ဘူးကွ။ ကောင်းတယ်။ ကောင်းတယ်“ ပြောပြီးတာနဲ့ တပြိုင်နက်ဖုန်းဆီသို့ မျက်လုံးပြန်ရောက်သွားပြန်သည်။

အို…ဒီလောက်ပဲလား။ ပြန်ရောက်တာ ၁နာရီနီးပါးရှိပြီ။ သူမနှုတ်က ဖွင့်ပြောမှပဲ…သူမဆံပင်ညှပ်ထားတာ သိသတဲ့၊ နောက်တော့ ပြန်ပြောတဲ့စကားကလည်း ကြည့်ပါဦး။ သူကတော့ အေးအေးဆေးဆေးပြောလိုက်တာပဲ။  ဒီကခံလိုက်ရတာတော့နင့်နေတာပဲ။ စိတ်တိုတိုနှင့် မျက်စောင်းတစ်ချက်ဆောင့်ထိုးပစ်လိုက်၏။

ညစာပြီးတော့ အိုးခွက်ပန်းကန်များ ဆေးကြော သိမ်းဆည်းပြီး အိပ်ခန်းထဲပြန်ရောက်လာတော့ သူမချစ်လင်က ကွန်ပျူတာမျက်နှာပြင်ကိုကြည့်ကာ ကြည်ကြည်နူးနူးပြုံးနေပြန်သည်။ စကားပြောဖို့ အနားကပ်သွားတော့ ဖျက်ကနဲ ပိတ်ပစ်လိုက်သည်။ သူမကလည်း ဖျတ်ကနဲ မြင်လိုက်ပါသည်။ ဆံပင်ရှည်ရှည်နှင့်  ကောင်မလေးတစ်ယောက်။ မနွယ်ပြောတာတော့ မှန်နေပြီ ဟုတွေးကာ စကားပြောချင်စိတ် ပျောက်သွားတာကြောင့် အိပ်ယာထဲပဲ ၀င်ခွေပစ်လိုက်တော့သည်။

အကြံဥာဏ်ရယ် ထွက်စမ်းပါ။ ဘာလုပ်ရရင်ကောင်းမှာလည်း။ နဖူးပေါ်လက်တင်ရင်း အသည်းအသန်စဉ်းစားနေမိသည်။ သူမမဟုတ်တဲ့ အခြားကောင်မလေးဓာတ်ပုံတွေကို ကြိုက်လှချည်ရဲ့ လှလှချည်ရဲ့ လို့ မှတ်ချက်သွားရေးတာကို သူမ မျက်ဝါးထင်ထင် မြင်ရရင် ခံနိုင်ရည်ရှိပါမည်လော။ သူမ မဟုတ်တဲ့ တခြားတယောက် နေမကောင်းတဲ့အချိန်တို့ စိတ်ဓာတ်ကျနေတဲ့အချိန်တို့ကျရင်လည်း ပျာနေအောင်ဂရုစိုက်တဲ့ စကားလုံးတွေနဲ့ သွားပြီးအားပေးတာတွေဖတ်ရရင်ရော သူမ ဒေါသထွက်ဝမ်းမနည်းဘဲ နေနိုင်မည်လော။ သူဘယ်စခန်းထိရောက်နေပြီလည်း ဆိုတာ သိလည်းသိချင်ရဲ့။ မြင်လည်းမမြင်ရဲ။ သက်ပြင်းများကို မကြာခဏပင် ချမိ၏။ ကိုထွန်းမောင်လည်း ဘယ်အချိန်မှ အိပ်ရာဝင်သလည်း မသိ။ သူမလည်း တဖြည်းဖြည်းနှင့် မျက်လုံးများမှေးစင်းကာ အိပ်ပျော်သွားတော့သည်။ နောက်တစ်နေ့တွင် ဖေ့စ်ဘုတ် အကောင့်တစ်ခုကို ဖွင့်လိုက်ပြီး အကို့ကိုပြောလိုက်သည်။

“အကို..မေ အကို့ကိုအတ်ထားတယ်နော်။ လက်ခံပေးဦး“

“ဟင်…ကိုယ့်အကောင့်ကိုဘယ်ကရလည်း..ကိုယ်သိပ်မသုံးဖြစ်ဘူး။ အင်း…လက်ခံလိုက်မယ်လေ“

“မနွယ်အမျိုးသားဆီက ရတာအကို”

ဘယ်လိုပဲပြောပြော မေနှင့်အကို သူငယ်ချင်းဖြစ်သွားသည်။ သူငယ်ချင်း ဖြစ်သွားတော့ အကို့လက်မထောင်မှုတွေ ဂရုစိုက်မှုတွေကို မနွယ်ပြောသလို ပြည့်နှက်နေအောင် မြင်ရသကဲ့သို့၊အကို့အပေါ် တဖက်သား၏ချွဲပြစ်စွာဂရုစိုက်မှုတွေကိုလည်း မမြင်ချင်မှအဆုံး တခါတရံအော့အန်ချင်လောက်အောင် မြင်ရသည်။ ကြာလာတော့ သူမ အခံရခက်လာသည်။ သည်တော့ အကို့ကိုဖွင့်ပြောလိုက်သည်။ ရလာတဲ့ ရလဒ် ကတော့ ၀ူးဝူးဝါးဝါးပါ။ “မင်းက လူကြီးလူကောင်းဆန်တဲ့စိတ်လေး ထားမှပေါ့။ ရိုးရိုးသားသား ခင်တာမင်တာပဲ။ ငါဘာတွေလုပ်နေလို့လည်း။ ငါ့သိက္ခာကို မချပါနဲ့။ သဘောထားမကြီးလိုက်တာ“ တဲ့။ သူမပြောချင်သည်က ရိုးသားသည်ဆိုလျှင် အကုန်လုံးသော သူငယ်ချင်းများကို အယုတ်အလတ် အမြတ်မရွေး လိုက်လျော ဂရုစိုက်ပေါ့။ ဘာကြောင့် တစ်ယောက်သောသူကို ထူးဂရုစိုက်ပြီးမှ ရိုးသားသည်ဟု ငြင်းချင်ရသည်လဲလို့။

“မေက တော်လေး၀၀င် အမျိုးသမီးထဲက တစ်ယောက်မှ မဟုတ်ခဲ့လေတာကြောင့် ။ ခင်ပွန်းကိုအချစ်လွန်တဲ့ သာမန်အမျိုးသမီးတစ်ယောက်သာဖြစ်တာမို့။ သာမန်သဘာဝအတိုင်းပဲ ခံစားတတ်တာမို့။ အကိုပြောသလိုတော့ အရမ်းကြီးသဘောထားမကြီးနိုင်ဘူးအကို။“

ဒါက မေ့ရင်ထဲက ပြောစကားများမျှသာ။ အပြင်မှာတော့ တစ်ခေါက်အပြောခံရပြီးနောက်ပိုင်းမေ ဘာမှကို ထပ်မပြောတော့ အကို့လက်မလေးတွေမြင်ရတိုင်း၊ မှတ်ချက်စာသားလေးတွေမြင်ရတိုင်း၊ တဖက်သားရဲ့အကဲပိုမှုတွေ မြင်ရတိုင်း၊ သက်ပြင်းလေးသာ ကျိတ်ချရင်း မေ့ရင်ဘတ်တွေစူးအောင့်ခဲ့ရသည်။ မမနွယ်ရဲ့ အမျိုးသားလို သူ့အမျိုးသမီးကို (Password) ပေးလို့ အကောင့်ကို ပေးသုံးဖို့မပြောနှင့်… မေ့ခံစားချက်ကို နားလည်ပေးဖို့ဖွင့်ပြောခဲ့တာတောင် သူကစိတ်ဆိုးခဲ့သေးတော့လည်း….တွေးရင်း ဒီရက်ထဲမှာ ချမိတဲ့သက်ပြင်းတွေ စိပ်လာ၏။

ကိုယ်ကသက်ဆိုင်သူမို့ သွားပြောပြန်လျှင်လည်း၊ ကိုယ့်ခံတပ်ကတောင် ကိုယ့်ကို ဒီလိုပြင်းထန်တဲ့စကားတွေနဲ့ သမုတ်ခဲ့လေတော့ တဖက်သားကလည်း ပြန်ကာပြီး မပြောဘူးလို့ မသတ်မှတ်နိုင်။ ပြီးတော့ မတော်တဆပြောမိရင်တောင် ရိုးသားပါသည်ဟူသောစကားလုံးတို့ဖြင့် တုန့်ပြန်ခဲ့ပါက ကိုယ်ကသာ စွပ်စွဲသူဟု ပြန်ဖြစ်သွားပေလိမ့်မည်။ ပြောဖို့ရာလည်း မသင့်တော်။ သူတို့လည်း မိန်းကလေးများမို့ ကိုယ်ချင်းစာသည်ရယ်လေ။ နောက်ဆုံး ကိုယ့်ခြံစည်းရိုး ခံတပ်မလုံမှန်း သေချာနေသည်မို့ သူမဘယ်လိုမှကို မလုပ်ချင်တော့။ ခံစားရပ်တည်နိုင်စွမ်းလည်းကုန်ခဲ့သည်မို့ ဖေ့စဘုတ်ကို ဖျက်သိမ်းပစ်ကာ ဥပေက္ခာနဲ့သာ နေလိုက်တော့၏။ တကယ်ဆို အကို မြတ်နိုး၍ လက်ထပ်ထားသည့် အမျိုးသမီးတစ်ယောက်ရဲ့ စိတ်ခံစားချက်ကို ငဲ့ညှာသင့်သည်သာ။

(၅)

နောက် ၈ရက်လောက် အကြာတွင် ကိုထွန်းမောင်၏ဖေ့စ်ဘုတ် သူငယ်ချင်းထဲတွင် သိပ်လှသော ကောင်မလေးတစ်ယောက်တိုးလာခဲ့သည်။ သူမအမည်က အေးတုတ်။

အေးတုတ်က ချစ်စဖွယ် စကားလုံးများကို သုံးလေ့ရှိသည်။ သိပ်လှသော ဓာတ်ပုံများကို တင်တတ်သည်။ ဒါပေမယ့် များများစားစားတော့မတင်တတ်။ ရှားရှားပါးပါး ၃ပုံထဲရယ်။

ကိုထွန်းမောင်က မေးကြည့်သည်။ ဘာလို့ အေးတုတ်လို့ မှည့်ထားရတာလည်း။ ရုပ်ကလေးနဲ့နာမည်နဲ့မလိုက်ဘူးဟူ၍။

အေးတုတ်က ပြန်ဖြေသည်။ “ညီမက ရုပ်ကလေးကသာလှနေတာပါ။ ဘော်ဒီက ဆင်ခန္ဒာရှင့်“ ။ မခင်မေရဲ့ ဗိုက်ခေါက်လေး မဆိုသလောက် ထွက်နေတာကို အပြစ်မြင်နေတဲ့ ကိုထွန်းမောင်က အေးတုတ်ကိုတော့ အားပေးရှာသည်။ ဆင်ခန္ဒာလည်း ဘာဖြစ်လည်း ညီမရယ်။ မျက်နှာလေးက ဒီလောက်ဖူးနေအောင် လှတာကိုများ…ဆိုပဲ။

အရင်ကဆို ကောင်လေးများရေးသော စတေးတပ်စ်ထက် အချို့ကောင်မလေးများ စတေးတပ်စ်ကိုသာ သူများများဖတ်ဖြစ်သည်။ ဘာကြောင့်ဆို သူတို့အပြောတွေက ညွတ်ကျနေအောင် ကောင်းသကိုး။ စွဲငြိအောင် ရေးတတ်ကြသည်။ ဓာတ်ပုံဆိုလည်း ထိုနည်းလည်းကောင်း။ ဘာကြောင့်ဆို ကောင်မလေးများ သိပ်လှသည်ကိုး။ ဒါပေမယ့် အကုန်လုံးကိုတော့ ကိုထွန်းမောင် မကြိုက်တတ်ပါ။ ငြိတွယ်အောင် စတေးတပ်စ် တင်နိုင်သော ကောင်မလေးများ နှင့် ဓာတ်ပုံလှတပတလေးများတင်တတ်သော ကောင်မလေးများ။ သူ့အားမကြာခဏ ချွဲတတ်သော ကောင်မလေးများကိုတော့ ကိုထွန်းမောင် အမြဲလို အားပေးတတ်သည်။

ခုတော့ တနေ့ထက်တနေ့ ကိုထွန်းမောင် ဇာတ်ရှိန်ပိုမြင့်လာသည်။ ဘယ်ကောင်မလေးပုံကိုမှ သိပ်ပြီး လက်မ မထောင်တော့။ စတေ့တပ်စ်တွေမှာ ကွန့်မန့်သွားမရေးတော့။ ဘာကြောင့်ဆို သူ့အာရုံတွေက အေးတုတ်ဆီပဲရောက်လို့နေသည်လေ။ အေးတုတ်ရဲ့ ပင်တိုင် ပရိသတ်သာလုပ်လို့နေသည်။

အေးတုတ်က စတေးတပ်စ်မှာ “အွန်“ လို့ရေးလိုက်လျှင်လည်း ကိုထွန်းမောင်တို့ လက်မနှေးဘဲ လက်မထောင်ပြီးသား။

အေးတုတ်က “စိတ်ညစ်တယ်“ ဆိုလျှင် ကိုထွန်းမောင်တို့အားပေးတဲ့ ကွန့်မန့်ရေးပြီးပြီ။
အေးတုတ်က “နေမကောင်းပါ“ ဟုပြောလျှင်လည်း ဂရုစိုက်ဖို့ တဖွဖွသွားပြောရတာအမော။

အေးတုတ်က အရေးအသားမှာလည်း ညွတ်ပျောင်းစွဲဆောင်နိုင်ရုံသာမက ပုံလှတပတလေး ၃ပုံလောက်တင်ထားတာမို့ ပရိသတ်ကတော့ အများသား။ အဲ့…ဒါပေမယ့် ပရိတ်သတ်အများကြီးထဲမှာမှ မိမိကို သူလေးက အရေးပေးသည်မို့ ကိုထွန်းမောင် ပျော်မြူးနေရသည်။

လာမည့်အပတ်ထဲတွင် တရုတ်နှစ်ကူး ရက်ရှည်ပိတ်မည်မို့ မြန်မာပြည်အလည်ပြန်မည်စိတ်ကူးမိသည်။ အရင်ကလို အေးတုတ်နှင့်ဖေ့စ်ဘုတ်တွင် နေ့စဉ်မပြတ်တွေ့ဖို့ရာ အခွင့်နည်းသွားပြီမို့ ဒီနေ့တော့ ကိုထွန်းမောင် အလွမ်းတွေသယ်နေမိသည်။

 “ညီမလေးကို အကိုရန်ကုန်ပြန်ရင်တွေ့ခွင့်ရနိုင်မလားဟင်။ ကိုယ်တစ်ရက်လောက်လာတွေ့မယ်လေ။ အိမ်ပြန်တုန်းဆိုတော့ မိသားစုနဲ့တွေ့ရမှာမို့ အလုပ်ရှုပ်နေရင် အွန်လိုင်းတက်ရတော့မှာမဟုတ်ဘူး။ အပြင်မှာသိပ်တွေ့ချင်တယ်ကွာ။ ကိုယ် အင်္ဂါနေ့ပြန်လာမှာ“ 

ခဏခဏ တတွတ်တွတ်ပြောပါများတော့ အေးတုတ်က အကြောင်းပြန်လာသည်။

“အင်း…အကို သိပ်တွေ့ချင်နေရင်လည်း မြေနီကုန်းက ဂမုန်းပွင့် ကုန်တိုက်အပေါက်ဝမှာ ကြသပတေးနေ့ ညနေ ၅နာရီကျရင် စောင့်နေမယ်လေ။ မိုးပြာရောင် တီရှပ်နဲ့ လုံချည် အနက်လေးဝတ်ထားမယ်။ နေကာမျက်မှန်တပ်ထားမယ်။ ဦးထုတ်အ၀ိုင်း အပြာနုလေးဆောင်းထားမယ်။ အကိုလာခဲ့ပေါ့။ ညီမခုတော့ အောက်လိုက်ဦးမယ်“

ဆိုကာ သူမအွန်လိုင်းမှပျောက်သွားတော့သည်။

(၆)

မခင်မေတစ်ယောက်ဖေ့စ်ဘုတ်သုံးလိုက်သည့် ၃လတာအတွင်း ခေတ်မှီစကားလုံးအသုံးအနှုန်းများတတ်မြောက်လာသည်။ ရယ်လျှင်တောင် ချစ်စဖွယ် မြည်သံစွဲအလင်္ကာလေးတွေထည့်လို့။ လျှာလေးထုတ်ပြ.သွားဖြဲရယ်ပြ. မျက်လုံးတဖက်မှိတ်ပြ။ တူနဲ့ထုလို့တိန်))) လို့မြည်သံလုပ်ပြတာလောက်ကတော့ အပျော့ပေါ့။ တတ်လာတာတွေမှ အများကြီးရယ်မှ အများကြီး။ 

အရင်က ဘာမှမလိမ်းချယ်တတ်။ တခါတရံ နှုတ်ခမ်းဆီလေးသာ ဆိုးတတ်သည့် အဆင့်ကနေ ခုတော့ မမှတ်မိနိုင်လောက်အောင် မိတ်ကပ်ကိုစပါယ်ရှယ် လိမ်းတတ်သည်အထိ ဆရာတဆူလည်းဖြစ်ခဲ့ပြီ။  ကိုထွန်းမောင် လက်မလေးတွေ သွားသွားထောင်တတ်တဲ့ စတေးတပ်စ်လေးတွေ လိုက်ဖတ်ရတာ။။ပြီးတော့ ဓာတ်ပုံလေးတွေ လိုက်ကြည့်ပြီး ဘေးနားချထားတဲ့ မှန်လေးနဲ့ ကိုယ့်ရုပ်ကိုယ် ပြန်ကြည့်ရင်း ယှဉ်ကြည့်ရတာလည်းအမော။

မျက်နှာစာအုပ်မှ ချစ်သူအတွဲလေးများ၏ ၀န်တိုမှုကိုလည်းတွေ့ရသည်။ ဟိုတလောကတောင် အသိအကိုကြီးတစ်ယောက်က သူ့စတေးတပ်စ်မှာရေးထားသေးသည်။  သင် (သို့မဟုတ်) ကျွန်တော်၏ လက်မထောင်ခြင်းများနှင် မှတ်ချက်ရေးမှုများသည် ကျွန်တော်နှင့် ကောင်မလေးကြား ၀န်တိုမှုနှင့် စကားကတောက် ကဆများကိုဖြစ်စေသည်။ ထို့ကြောင့် ကျွန်တော်သည် ချစ်သူကောင်မလေးနှင့် အဆင်ပြေခြင်းအလို့ငှာ လက်မထောင်ခြင်းနှင့် မှတ်ချက်ရေးခြင်းများ ကျဲပါးမည်ဖြစ်ကြောင်း သိစေအပ်ပါသည်။  တဲ့။ တချို့ချစ်သူယောက်ျားများကျတော့ သူတို့ကောင်မလေးများကို အဲ့လိုနားလည်ပေးတတ်။ လိုက်လျောတတ်ကြသည်။သူမအဖြစ်ကသာ ကိုထွန်းမောင်ကို ပြသနာရှာဖို့မပြောနှင့် တောင်းဆိုကြည့်ပါဦး။ မနွယ်ပြောသလိုပင် နားလည်မှုမရှိတဲ့ အမျိုးသမီးဟု စကားလုံးကြီးကြီးနှင့် သူမကို စိတ်ဆိုးပေလိမ့်မည်။

ထိုအခါမျိုးတွင်တော့ “ချစ်တော့လည်း ၀န်တိုတာပေါ့။ ဒါကို တချို့ချစ်သူတွေက နားလည်တယ်။ ခင်ပွန်းအဖြစ် ပေါင်းသင်းလာတဲ့ အကိုတို့က မေတို့မနွယ်တို့ကို ဘာကြောင့် နားမလည်ပေးတာလည်း မသိဘူးနော်“ ဟု မနွယ်ကို ၀မ်းနည်းစွာဖြင့် ငြီးတွားပြောမိသည်။

တခါတရံတော့ ရည်းစားရှိမှန်း (သို့) အိမ်ထောင်ရှိမှန်း မသိမသာလည်း မဖော်ပြ။ သိသိသာသာလည်း မဖော်ပြထားတော့ (ဥပမာ- ကိုထွန်းမောင်လိုလူမျိုး) ဆတ်ဆတ်ကဲ မိန်းကလေူးတွေက အီကြ။ ထိုအခါသက်ဆိုင်သူတွေက ၀မ်းနည်းကြ။ စိတ်ကြေကွဲမှုတွေဖြစ်ကြ။ ကတောက်ကဆဖြစ်ကြနဲ့ ။ သြော်…ဖေ့စ်ဘုတ်..ဖေ့စ်ဘုတ် …အတုအယောင်လိုင်းမို့သာပဲ။ အစစ်သာဆို ဘယ်လောက်တောင်မွှေလိုက်မလဲလို့“ ဟု အတွေးတွေ ပွားမိသည်။

ဘာလိုလိုနှင့် နောက် ၄ရက်ကြာလျှင် ရန်ကုန်အလည်ပြန်ရဦးမည်။

(၇)

ဗုဒ္ဓဟူးနေ့ညဖက်တွင်တော့ လင်မယား၂ယောက်ကျောချင်းကပ် အိပ်နေရင်း ကိုထွန်းမောင်က မနက်ဖန် ညနေ၅နာရီတွင် မခင်မေကို ဘယ်လို လှိမ့်ထွက်ရမလည်းအကြံထုတ်နေသည်။

မနက်မိုးလင်းတော့ မခင်မေက မိဘများအိမ်သွားမည် မှောင်မှပြန်လာမည်ဆိုတော့ ကိုထွန်းမောင်အတော်ပျော်သွားသည်။ ဘာမှ လှိမ့်စရာမလိုတော့ပါတကား။

(၈)

ချိန်းဆိုထားသော ၅နာရီ။

ဂမုန်းပွင့် ကုန်တိုက်အပေါက်ဝတွင် နေကာမျက်မှန်တပ်ထားသော မိုးပြာရောင်အမျိုးသမီးကို ခပ်ဝေးဝေးကပင် ကိုထွန်းမောင် လှမ်းမြင်ရ၏။ အေးတုတ်ပြောထားသော အဆင်အပြင်အတိုင်းပင်ကွက်တိမို့  ဆင်ခန္ဒာမဟုတ်ပါဘူးလေ။ အနေတော် ကိုယ်လုံးလေးပါဟု တွေးလိုက်မိရင်းအနားသို့ အပြေးလေးပင်လျှောက်သွားလိုက်သည်။

သူအနားရောက်ခါနီးတော့ မျက်မှန်မချွတ်သေးပေမယ့် ပြုံးနေသော နှုတ်ခမ်းများကို အပြင်လောကတွင်သေချာမြင်ဖူးသည်ဟု စဉ်းစားမိသည်။

အနားရောက်ချိန်တွင်တော့ အေးတုတ်က မျက်မှန်လေးကို အသာအယာချွတ်လိုက်ရင်း “အကို အေးတုတ် လှရဲ့လားဟင်“ ဟူ၍ မေးလိုက်လေ၏။

ရုပ်မြင်သံကြားထိုခဏကို ကြုံတွေ့လိုက်ရသောအခါတွင်တော့ ကိုထွန်းမောင်တစ်ယောက်..ဘာပြောလို့ပြောရမှန်းပင်မသိတော့ဘဲ အိုးတိုးအမ်းတမ်းနှင့် ဘ၀တွင်အနေရအခက်ဆုံးသော အသေးသိမ်ဆုံးသော တော်တော်ဆိုးရွားသည့်ခံစားချက်ကို ခံစားလိုက်ရသည်။ ဖြစ်နိုင်လျှင် ကားလမ်းမပေါ်တွင် မျောလွင့်နေသော ကားမီးခိုးလုံးများနှင့်သာ အငွေ့ပျံပါသွားချင်တော့သည်။ ကိုယ့်မျက်စေ့ရှေ့မှောက်က ကိုယ်သိပ်တွေ့ချင်နေသော၊ သိပ်လှနေသော အေးတုတ်သည် တကယ်တော့ ကိုယ်မြတ်နိုးစွာချစ်ခင်သည့် ဇနီးတစ်ယောက်ပါပေလား။

ကိုယ်မမှတ်မိနိုင်လောက်အောင်ပြောင်းလဲနိုင်သော မိတ်ကပ်ပညာကိုတော့ လေးစားမိသည်။

ပါးစပ်အဟောင်းသားနှင့်ခေါင်းငုံ့သွားပြီးထဲက ပြန်မော့မလာတော့သော ခင်ပွန်းသည်ကိုကြည့်ပြီး မခင်မေ တော်တော်အားနာသွားမိသည်။ ဒီလို အသိစိတ်ကင်းမဲ့သွားပုံမျိုးနှင့် ကြာကြာရပ်တည်နိုင်မည်မဟုတ်မှန်းသေချာနေသည်မို့ လက်ကလေးကို အသာဆွဲခေါ်ခါ  အနီးရှိ အအေးဆိုင်ထဲသို့ ၀င်ခဲ့သည်။

“အကို မေ့ကို စိတ်ဆိုးသွားလားဟင်။ တကယ်တော့ မေ…အဲလိုဖြစ်သွားဖို့ မရည်ရွယ်ခဲ့ပါဘူး။ တခြားမိန်းကလေးတွေဆီ အာရုံရောက်နေတဲ့ ကိုယ့်ခင်ပွန်းကို ကိုယ့်ဖက်မှာရှိသေးရဲ့လားလို့သိချင်စိတ်နဲ့ တဖက်ကလည်း ပြန်ဆွဲခေါ်ရုံသက်သက်ရယ်ပါ။ တကယ်တော့ မေတို့က အိမ်ထောင်သည်တွေဖြစ်နေပြီလေ။ အဲ့ဒီတော့ မေ နောက်ဆုံးအနေနဲ့ ကြိုးစားခြင်းပါ။ အကို့ကိုလည်း မညာရက်တာကြောင့် ဒီနေ့တွေ့ဖို့ ချိန်းလိုက်တာ။ အကို ခုအရာအားလုံးကို ဆုံးဖြတ်နိုင်ပါပြီ။ အဲ့ဒီ့ဘ၀လေးမှာ ပျော်နေမယ်ဆိုလည်း ပျော်ဖို့ အကိုရွေးချယ်လိုက်ပ်ါတော့။ အကိုပျော်ရာတွေပဲ ရွေးချယ်လုပ်တော့နော်။ မေကတော့ ခုရန်ကုန်ပြန်တုန်း မိဘတွေနဲ့ပဲ နေခဲ့တော့မယ်။ မေကတော့ အေးတုတ်ကိုပါ အကို့ဘ၀ထဲက အပြီးခေါ်သွားတော့မှာဖြစ်တဲ့အတွက် အေးတုတ်နဲ့ ခင်မေတို့ကတော့ အကို့ဘ၀မှာ ရှိတော့မှာမဟုတ်ပါဘူး။ မေမေတို့ အထင်မလွဲစေဖို့တော့ မေ ကြည့်ပြောလိုက်ပါမယ်။ အဲ့ကိစ္စအတွက်တော့မပူပါနဲ့နော်။ ခွင့်ရက်စေ့ရင် လမ်းခွဲကြတာပေါ့။ မေ မခံစားနိုင်တော့လို့..ဒီလမ်းကို အကို့ကိုရွေးချယ်ခွင့်ပေးလိုက်တာပါ။“

ပြောအပြီးမှာပဲ ညနေခင်းတွင်တောက်ပနေသည့်နေရောင်အောက်သို့ တိုးဝင်သွားရန် သူမခြေလှမ်းစခဲ့သည်။

ထိုအခိုက် အကို့လက်တစ်ဖက်က သူမကို ဖျတ်ခနဲ လှမ်းဆွဲလိုက်သည်။

“မေ..တကယ်တော့ အကို့စိတ်ပျော်ရွှင်မှုတခုနဲ့ အားနာမှုတွေအတွက် အကို စိတ်ထဲပါရာတွေ လုပ်ခဲ့တာပါ။ တကယ်ကို ကိုယ်ရိုးသားခဲ့ပါတယ်။ ရိုးသားခဲ့ပါတယ်ဆိုတာ ယုံကြည်နေလို့လည်း မေ့ခံစားချက်ကိုထည့်မတွက်မိတော့ဘဲ မေ့ရှေ့မှာပဲ မဆင်မခြင် “ငါရိုးသားတာပဲကွာ မရိုးသားတာဘာလုပ်နေလို့လည်း“ ဆိုတဲ့စိတ်နဲ့ ကိုယ်ရှေ့ဆက်တိုးမိတာပါ။ တကယ်တော့ ကိုယ့်ကိုချစ်တဲ့သူ။ ကိုယ်ချစ်တဲ့သူရဲ့ စိတ်ခံစားချက်ကို ကိုယ်ထည့်မတွေးမိသလို ဖြစ်သွားတယ်။ ကိုယ်အတ္တကြီးသလိုဖြစ်သွားခဲ့တယ်။ ကိုယ့်ကို လာပတ်သက်မှုတွေမှာ။ ဂရုစိုက်မှုတွေမှာ အပြင်မှာ လူမမြင်ဖူးခဲ့ရဘဲ စကားလုံးလှလှလေးတွေရဲ့ဖျားယောင်မှုနဲ့ရင်းနှီးခဲ့ရတဲ့အပေါ်မှာ ကိုယ်သာယာမိသလိုဖြစ်သွားတယ်။အဲ့ဒီ့အတွက် ကိုယ်ဆင်ခြင်သင့်မှန်း ခုတော့ သဘောပေါက်သွားပြီ။ မေဟာ အေးတုတ်နဲ့ အတူ ကိုယ့်ဘ၀ထဲမှာ အရင်လိုပဲ ပြန်နေပါနော်“

ဘယ်တော့မှ ကိုယ်မှားသွားပါတယ်ဆိုတဲ့ စကားလုံးကို သုံးမှာမဟုတ်တဲ့ ချစ်ခင်ပွန်းအကြောင်းလည်းသိပြီးသားမို့ သူမထပ်ပြီး စိတ်မတင်းထားချင်တော့။ ပစ်တိုင်းထောင်ရုပ်ကြီးလိုပဲ လာနှဲ့သူကြောင့် ခဏတဖြုတ် တလှုပ်လှုပ်ဖြစ်သွားခဲ့ပေမယ့် ပြန်တည်ငြိမ်ထောင်မတ်လာသည့် ခင်ပွန်းသည်ကို မေခွင့်လွှတ်ကြည်ဖြူသင့်သည်လေ။

ထပ်မံဆွဲယူလိုက်တဲ့ လက်တစ်ဖက်မှာ မေ့လက်လေးကို အလိုက်သင့်ထည့်ပေးလိုက်ရင်း အပြင်ကို လှမ်းကြည့်လိုက်တော့ ကားများစီတန်းသွားလာနေသည့် လမ်းမကြီးအထက်ကောင်းကင်က ညနေခင်း နေရောင်ခြည်သည် လှချင်တိုင်းလှနေပေတော့၏။

။။။။။။။။။။

ကြည်ဖြူပိုင်

 မေ ၂၀၁၃ 

small photos are taken from Google.

Read More

ထင်ကျန်စေခဲ့သော စတေးခြင်း ခြေရာငယ်

၁)

Tom Booker သည် အမေရိကန်ပြည်ထောင်စုထဲမှ မွန်တာနာ (Montana) အမည်ရှိသော သာယာကျယ်ပြန့်လှသည့် နေရာလေးတွင် နေထိုင်သူဖြစ်ပါသည်။ သူ့အဖိုးနှင့်ဖခင်တို့က (သခင်စကား မနာခံဘဲ) ဆိုးသွမ်းနေသော မြင်းများကို လူအများ နားမလည်နိုင်သော လေသံတိုးငြင်းမျှပြောဆိုရုံဖြင့် မြင်းများကို လိမ္မာ ယဉ်ကျေးလာအောင် ပြုလုပ်နိုင်သူများအဖြစ် ထင်ရှားခဲ့သည်။ ထိုသို့သော ပညာကို သားငယ်ဖြစ်သူ Tom ကအပြည့်အ၀ ရရှိခဲ့ကာ ထိုဖက်တွင် ပါရမီအတော်ပင်ထူးချွန်ခဲ့ပေသည်။ Tom ၏  အဖိုးနှင့် ဖခင်ရှိစဉ်အချိန်ကတော့ ဆောင်းဦးပေါက်ကာလများသို့ရောက်ချိန်တွင် မိသားစုဝင်အားလုံး မြင်းကိုယ်စီစီးကာ တောထဲသို့ပျော်ပွဲစားသွားလေ့ရှိသည်။

ပျော်ပွဲစားထွက်သည့်အခါတိုင်း လတ်ဆတ်စိမ်းစိုသောမြက်ခင်းပြင်များပေါ်တွင် လှဲချရင်း ကျယ်ပြောလှသော အပြာနုရောင် ကောင်းကင်ပြင်ကြီးကို မော်ကြည့်ကာ သာရကာတို့၏ အသံကို နားဆင်ရင်းဖြင့် ပျော်ရွှင်ဖွယ်ကောင်းသော မိသားစု၏ အချိန်များကို ပိုင်ဆိုင်ခဲ့ပေသည်။

လူကြီးမိဘများ တိမ်းပါးသွားချိန်တွင် Tom ၏အကို Frunk က ထိုကဲ့သို့အချိန်ကာလမျိုးကိုပြန်ရချင်သည်ဟု မကြာခဏပြောလေ့ရှိသည်။ Tom ကတော့ ယခုအချိန်မှာ လက်ရှိအဖြစ်ကို လက်ခံထားဖို့ကိုသာ အကိုဖြစ်သူအား ဖြောင်းဖြခဲ့သည်။ မိဘများရှိစဉ်အခါက Tom အား မိသားစုအားလုံး နားမလည်နိုင်သော အချက်ရှိခဲ့သည်။ ထိုသည်ကတော့ Tom သည် မြင်းများကို ယဉ်ပါးလာအောင် ထိန်းကျောင်းနိုင်သော စွမ်းအင်တမျိုးရှိလျက်နှင့် အဘယ်ကြောင့်များ ထိုအလုပ်နှင့် အသက်မွေးမှုမပြုလေသနည်းဟူ၍ပင်။

အရွယ်ရောက်လာသော Tom တစ်ယောက် မိသားစုထင်မှတ်မထားသော လုပ်ရပ်တစ်ခုကိုလည်း လုပ်ခဲ့သေးသည်။ အောက်စဖို့သို့ ပညာသွားသင်ပြီး ကျောင်းပိတ်၍ ပြန်လာသောအခါတွင်မတော့ ခေတ်ပေါ်ဂီတပညာသင်ကျောင်းမှ ကျောင်းသူလေး Rachel ကိုခေါ်လာခဲ့ပြီး ချစ်စရာ့သားငယ် Hal ကိုမွေးဖွားခဲ့သည်။ Tom သည် ဇနီးသည်နှင့် သားငယ်ကို အလွန်ချစ်ခင်တွယ်တာကာ ခင်ပွန်းကောင်းပီသခဲ့ပေသည်။ သို့သော် တောတောင်သဘာဝတွင်မြတ်နိုးနေသားကျနေသော Tom ထံပါးတွင် စာပေ၊ ဂီတ၊ မြို့ပြယဉ်ကျေးမှုတို့တွင်သာ အသားကျပျော်ဝင်နေသော Rachel ကြာရှည်စွာမပျော်ပိုက်နိုင်တော့။ ထို့ကြောင့် တခုသော ဆောင်းဦးပေါက်အချိန်တွင် သားကလေးကို ယူဆောင်ခေါ်ငင်လို့ Rachel တစ်ယောက် သူမ , ပျော်မွေ့ရာမြို့ပြသို့သာ ပြန်သွားခဲ့သည်။ ထိုအချိန်မှစ၍ Tom သည် သူတွယ်တာမြတ်နိုးရာမြင်းများကို ကူညီကယ်တင်ပေးသော အလုပ်ဖြင့် ဆေးခန်းဖွင့်ကာ သူ့ဘ၀ကို ရှေ့ဆက်လှမ်းခဲ့ပေသည်။

(၂)

ချမ်းအေး၍ ဆီးနှင်း ထူထပ်လှသော ဆောင်းဦးမနက်ခင်းတစ်ခုတွင် ဂရေ့စ်နှင့် သူမ၏ အနှစ်သက်ဆုံးမြင်းကြီး Pilgrim ၊ ဂရေ့စ်၏ သူငယ်ချင်း ဂျူဒီ နှင့် သူမ၏မြင်းကြီး Gulliver တို့သည် မြစ်တစ်စင်းအပေါ်ဖြတ်သန်းနေသော တံတားဟောင်းလေးတစ်ခုကို ရှာဖွေဖို့ရန် ထွက်လာခဲ့ကြသည်။ တံတားလေးကိုတွေ့သောအခါ ဂျူဒီ က၀မ်းသာအားရဖြင့် သူမ၏ မြင်းကြီးနှင့်အတူ တံတားပေါ်သို့ အရင်ဆုံး တက်သွားခဲ့သည်။ ဂရေ့စ်ကိုလည်း လိုက်ခဲ့ဖို့ရန်လှမ်းခေါ်သည်မို့ဂရေ့စ်နှင့် Pilgrim လည်းတံတားပေါ်တက်ရန် ကြိုးစားခိုက်တွင် ဂျူဒီ၏မြင်းကြီးခြေချော်ကျသွားသည့်အချိန်နှင့် ကြုံလိုက်ရသည်။ မြင်းကြီးပြန်အထတွင် ဂျူဒီ ၏ခြေထောက်တစ်ဖက်မှာ မြင်း၏ ဇက်ကြိုးနှင့် ငြိပါသွားသောကြောင့် ခေါင်းနှင့်မြေကြီး ပြင်းထန်စွာ ရိုက်မိပြီး ဂျူဒီ ခမျာ မလှုပ်နိုင်ရှာတော့ပေ။ ဂရေ့စ်နှင့်သူ့မြင်းကြီးလည်း ဂျူဒီ တို့ကိုကယ်ဖို့ကြိုးစားခဲ့သော်လည်း အချိန်တို့က နောက်ကျသွားခဲ့ပါပြီ။

ထို့အချိန်မှာပဲ နီးကပ်ကျယ်လောင်လှသော ကားဟွန်းသံကြောင့် သက်ရှိ ၄ဦးသားတို့သည် အပြင်းအထန်ကြောက်ရွံ့မှုများနှင့်  ရှောင်တိမ်းချိန်မရလောက်အောင်ဖြစ်သွားခဲ့ကြသည်။ မထင်မှတ်ထားတဲ့ အဖြစ်အပျက်တစ်ခုကတော့ မတ်တပ်က မလဲဘဲကျန်နေသေးတဲ့ Pilgrim ဟာ သူ့နားကို ဘရိတ်အုပ်ချိန်မရအောင် ရောက်လာခဲ့တဲ့ ထရပ်ကားရဲ့ ဦးခေါင်းခန်းကို ရှေ့ခြေ၂ခြောင်းမြှောက်ထောင်လို့ ရန်မူလိုက်တာပါပဲ။ ဒါကြောင့် ဂရေ့စ်လည်း မြင်းပေါ်က ပြုတ်ကျလို့ မြစ်ဘေးနား ပြုတ်ကျသွားခဲ့သည်။ ထို့အတူ Pilgrim လည်း ဂရေ့စ်နှင့်အတူ မြစ်ဘေးကို ရောက်သွားခဲ့လေသည်။

၃)

နယူးယောက်မြို့မှ အောင်မြင်သော ရှေ့နေတစ်ဦးဖြစ်တဲ့ ဂရေ့စ်ရဲ့ဖခင်ဟာ ရုံးကပြန်ရောက်လာချိန်မှာတော့ မက်ဆေ့ဂ်ျစက်ကလေးမှ မက်ဆေ့ဂ်ျများက စောင့်ကြိုနေခဲ့ပါသည်။ တစ်ခုက အိမ်ပြန်နောက်ကျမည်ဟု အကြောင်းကြားထားတဲ့ ဖက်ရှင်မဂ္ဂဇင်းတိုက်မှာ အလုပ်လုပ်နေသူ ဇနီးသည်ထံမှ၊ နောက်မက်ဆေ့ဂ်ျတစ်စောင်ကတော့ သမီးဖြစ်သူ ဂရေ့စ် ဆေးရုံသို့ရောက်နေကြောင်း Pilgrim ကိုထားရာမြင်းဇောင်းရှိ အမျိုးသမီးထံမှ အကြောင်းကြားစာ။ ထို့ကြောင့် ဇနီးဖြစ်သူ အန်န်နီ ကိုချက်ခြင်းပင်ဖုန်းဆက်ခေါ်ပြီး ဆေးရုံသို့သွားခဲ့သည်။

ဇနီးဖြစ်သူဆေးရုံသို့ရောက်လာသောအခါ ဂရေ့စ်၏ ခြေထောက်တစ်ဖက်ကို ပေါင်နားမှစ၍ ဖြတ်ပစ်ရတော့မည့်အကြောင်းပြောပြခဲ့တော့ ၀မ်းနည်းကြေကွဲမှုလွှမ်းသွားတဲ့ ဇနီးသည်ကို နှစ်သိမ့်ဖို့ရာ စကားစရှာမရခဲ့။ ဂရေ့စ်ဆေးရုံတက်နေစဉ် တလျှောက်လည်း ဇနီးမောင်နှံ ၂ဦး တယောက်တလှည့်စောင့်ပေးရင်းနှင့် စိုးရိမ်ပူပန်မှုများကြီးစိုးခဲ့ကြသည်။ Pilgrim ၏ဒဏ်ရာများကို ကြည့်ရှုပေးနေသော ဆရာဝန်က Pilgrim ဟာ ပြင်းထန်တဲ့ ဝေဒနာကို ခံစားနေရတဲ့အပြင် ရိုင်းစိုင်းခက်ထန်နေတာကြောင့် ပစ်သတ်ခွင့်ကို ပိုင်ရှင် (အန်န်နီ) ဆီကတောင်းပေမယ့် အန်န်နီ ကခွင့်မပြုခဲ့ပါ။ သူ့သမီးနဲ့ Pilgrim က ခွဲမရအောင် ချည်နှောင်ထားသူများဖြစ်တယ်လို့ သူမယူဆထားလို့ပါပဲ။ ထို့အတူမြင်းများကို စိတ်ဝင်စားချစ်ခင်တတ်တဲ့ ၀ါသနာကလည်း သမီးဖြစ်သူနဲ့တူနေတာကြောင့် ကယ်တင်ချင်ခဲ့သူပါ။

၎)     

ဆေးရုံက ဆင်းလာတဲ့ ဂရေ့စ်ရဲ့ ပထမဆုံးဆန္ဒကတော့ Pilgrim ကိုတွေ့လိုမှုပဲဖြစ်ခဲ့ပါတယ်။ ဖခင်ဖြစ်သူကို တောင်းဆိုပြီး မိသားစု ၃ဦးသား Pilgrim ကိုသွားကြည့်ချိန်မှာတော့ Pilgrim အတွက်  ဂရေ့စ်၏ ၀မ်းနည်းမှုနှင့်  စိတ်ထိခိုက်မှုတို့ကပြင်းထန်လွန်းလှသည်။ သွားဝါများကို နောက်သို့လှန်ဆွဲထားသကဲ့သို့ထင်ရစေသောအံကြိတ်မှု၊  မျက်နှာတလျှေက် ရုပ်ဆိုးစေသော အစင်းကြောင်း အမာရွတ်ကြီးနှင့် မြေကြီးထိအောင် ငိုက်စင်းကျနေသော လည်ပင်းတို့က Pilgrim ၏ စိတ်ဓာတ်ကျမှုနှင့် ရှင်သန်မနေချင်သောစိတ်တို့အား အထင်းသားပြနေခဲ့သည်။

ဂရေ့စ်မှာလည်း သာမန်ကလေးတစ်ယောက်ကဲ့သို့ ပြန်မဖြစ်နိုင်တော့သာ ခြေတဖက်မဲ့ ဘ၀ကို အားငယ်စိတ်ပျက်ကာ မကျေမနပ်ဖြစ်လာခဲ့သည်။ သူမ၏ အတွေးထဲတွင် သေဆုံးသွားသော သူငယ်ချင်း ဂျူဒီနှင့် အသက်ရှင်နေခြင်းအတွက် မကျေနပ်ရန်လိုကာ ခက်ထန် ရိုင်းစိုင်းနေသော သူမ၏ မြင်းကြီး Pilgrim တို့၏ အဖြစ်ကိုသာမြင်ယောင်ကာ မပျော်ရွှင်နိုင်ခဲ့။

အန်န်နီ တစ်ယောက် သမီးဖြစ်သူ၏ စိတ်ခံစားချက် ပျော်ရွှင်မှုများကို ပြန်လည် တည်ဆောက်ပေးနိုင်ရန်အတွက် သူမလုပ်နိုင်မည့် နည်းလမ်းများကို ရှာဖွေဖတ်ရှုရင်းဖြင့် The horse whisperer များအကြောင်းကို သိလာခဲ့ရသည်။ ထို့နောက်မတော့ Pilgrim ၏ ဝေဒနာများကို ကြည့်ရှုပေးနေသည့် ဒေါက်တာဆီမှ Tom Booker ၏ လိပ်စာကို ရရှိခဲ့သည်။ ပထမဆုံး Tom ကို နယူးယောက်သို့ဖိတ်ခေါ်ပြီး Pilgrim ကိုလာရောက်ကြည့်ရှုစေခဲ့သည်။ သို့သော် အခြေအနေဆိုးရွားလွန်းကာ ရိုင်းစိုင်းခက်ထန်လွန်းလှသော Pilgrim ကြောင့် ကုသဖို့ရန်လက်လျှော့ကာ ပြန်သွားခဲ့သည်။

သို့သော် အန်န်နီကတော့ လက်မလျှော့ခဲ့။ သူမ၏ သမီးလေး ပျော်ရွှင်စေရေးအတွက် Pilgrim ကိုပြန်ကောင်းစေလိုသည်။ သည်အတွက် Tom Booker ဆီသို့သွားနိုင်ရန်အတွက် အစီအစဉ်များရေးဆွဲတော့သည်။ Tom နေထိုင်သောမြို့လေးအနီးရှိတည်းခိုခန်းတွင် ဂရေ့စ်နှင့်သူမအတွက် အခန်းငှားသည်။မြို့ပြင်ရှိမြင်းဇောင်းတွင်တော့ Pilgrim ကိုထားရန်စီစဉ်ထားသည်။ အားလုံးအဆင်သင့်ဖြစ်ချိန်တွင်တော့ ခင်ပွန်းဖြစ်သူနှင့် သမီးဖြစ်သူကိုပြောပြခဲ့သည်။ သူမ၏ စိတ်ထဲတွင်တော့သူမ စီစဉ်သမျှ၊ သူမ၏ စကားကို ထို ၂ယောက် မလွန်ဆန်ကြ။ ဘယ်လိုပဲဖြစ်ဖြစ်နောက်ဆုံးတော့ လက်ခံကြသည်ပဲဖြစ်သည်ဟု ထင်ထားခဲ့သည်။

 သို့သော် ဂရေ့စ်၏ စိတ်ထဲတွင် ထိုအဖြစ်အတွက် အဖုအထစ်ဖြစ်ခဲ့သည်။ သူမ၏ မိခင်သည် မိမိကိုယ်ကို ယုံကြည်လွန်းသည်။ သူမ၏ နှစ်သက်ခြင်း မနှစ်သက်ခြင်း၊ တို့ကို မိခင်ဖြစ်သူ သိသကဲ့သို့ ပျော်ရွှင်မှု ၀မ်းနည်းမှု၊ ကျရှုံးမှု ၊ အောင်မြင်မှု ဒါတွေကို နားအလည်ဆုံးက သူမ၏ မိခင်သာဖြစ်ခဲ့သည်။  သို့သော်လည်း သူမတို့ သားအဖ ၂ဦး၏ ဆန္ဒကို အရင်တောင်းဆိုခြင်း မပြုဘဲ စီစဉ်ပြီးသည့် အခါမှသာ လိုက်နာရန် ပေးသိစေခဲ့သော မိခင်၏ ယုံကြည်မှုလွန်ကဲခြင်းအတွက်တော့ သူမစိတ်ဆိုးမိသည်။ ထိုအချိန်မှ စလို့ သားအမိ ၂ဦး၏ ဆက်ဆံရေးက အဆင်မပြေလှ။

(၅)

(Montana) သို့ရောက်၍ Tom ထံသွားကာ Pilgrim ကိုကြည့်ပေးရန်တောင်းဆိုသောအခါတွင်လည်း ဂရေ့စ်က စိတ်မ၀င်စားသယောင်သာ။ အန်န်နီ၏တောင်းဆိုမှုအထပ်ထပ်ကြောင့် Tom ကလက်ခံကာ Pilgrim အကြောင်းဆွေးနွေးရန်နှင့် ပိုင်ရှင်ဖြစ်သော ဂရေ့စ်က ကူညီရန် တောင်းဆိုသောအခါတွင် ဂရေ့စ်က ခပ်မဆိပ်သာ။ Tom က Pilgrimပြန်ကောင်းမှာ သေချာကြောင်း အားပေးစကားပြောသည်တွင်မှ ကူညီရန်သဘောတူခဲ့သည်။ ထိုမှအစပြု၍ Tom က Pilgrim ကို ကုသမှုများစတင်တော့သည်။ ရိုင်းစိုင်းခက်ထန်သွားခဲ့သော Pilgrim ၏ အမူအရာများ Tom အပေါ်တွင် တဖြည်းဖြည်းနှင့် အေးဆေးငြိမ်သက်လာခဲ့သည်။ Pilgrim သည် Tom ၏ နှုတ်မှ ထွက်ပေါ်လာသော Pilgrim တို့လိုမြင်းများသာ နားလည်နိုင်သော လေသံတိုးလေး (Whisper) ဖြင့် Pilgrim ၏ စိတ်နှလုံးကို ငြိမ်းအေးစေခဲ့သည်ထင့်။

(၆)

မိန်းမသားချည်းဖြစ်သော သူမတို့ ၂ဦးအား နေထိုင်မှုအဆင်ပြေစေရန် Tom အိမ်ထောင်ကျစဉ်က နေထိုင်ခဲ့သော အိမ်ကလေးတွေင်လာရောက်နေထိုင်ရန် Tom နှင့် သူ့အကိုမိသားစုက ဖိတ်ခေါ်ခွင့်ပြုခဲ့သောကြောင့် သူမတို့ ၂ဦးထိုအိမ်လေးတွင် နေဖြစ်ခဲ့သည်။ Montana တွင် နေထိုင်စဉ်ကာလအတွင်း Pilgrim ၏ တနေ့တခြားတိုးတက်လာမှုကို မြင်ရသော ဂရေ့စ် .. ပျော်ရွှင်မှုများ တစတစ ပြန်လည်ရရှိလာခဲ့သည်။ ထို့အတူ Tom ၏ တူလေးဖြစ်သော ဂျွန် ကလည်း ဂရေ့စ်နှင့် မတိမ်းမတိမ်းမယိမ်းအရွယ်လေးများဖြစ်လေရာ သူမအဖို့ သူငယ်ချင်းအဖော်ဖြစ်ခဲ့သည်လေ။ အန်န်နီက Tom နှင့် သူ့အကိုမိသားစုကို ညစာဖြင့် တည်ခင်း ဧည့်ခံရန် စားသောက်စရာများ ၀ယ်ဖို့ရန် ဈေးဝယ်ထွက်ခိုက် ဂရေ့စ်နှင့် ဂျွန်တို့ ၂ဦးက ဂျွန်ပိုင်ဆိုင်သောမြင်းငယ်ကလေနှင့် သူတို့မြို့လေးမှ အတန်ငယ်ဝေးကွာသော အရပ်ရှိ သာယာချမ်းမြေ့သောတောလေးထဲသို့ထွက်သွားခဲ့သည်။ ထိုတောထဲမတွင်တော့ Accident အပြီးတွင် ဘယ်တော့မှမြင်းမစီးတော့ဟု ဆုံးဖြတ်ထားခဲ့သော ဂရေ့စ်တစ်ယောက် ဂျွန်၏အကူအညီဖြင့် ပထမဦးဆုံးအကြိမ် မြင်းပြန်စီးဖြစ်သွားသည်လေ။ သို့သော် မိခင်အား စိတ်ခုထားကာ စကားဟဟပင် မပြောသည်မှာ ကြာပြီဖြစ်သော ဂရေ့စ်က ထိုအကြောင်းများကို.မိခင်ဖြစ်သူအား ပြန်မပြောပြခဲ့ပေ။

(၇)

နောက်တနေ့ညစာ စားပွဲတွင် ဂျွန်နှင့် မောင်နှမများ၊ ကလေးသဘာဝ ဆော့ကစား စကားနိုင်လုကြရင်း ဂျွန့်ညီမလေးတစ်ဦးက ဂျွန်နှင့် ဂရေ့စ်တို့မြင်းစီးကြသည့်အကြောင်းများကိုပြန်ပြောကြသည်တွင် အန်န်နီတစ်ယောက် ထိုအကြောင်းအရာအတွက် စိုးရိမ်ပူပန်စိတ်များ ပိုသွားခဲ့သည်။ ထိုညတွင် ရင်ဖိုစိတ်လှုပ်ရှားစရာလည်း ကြုံခဲ့သည်။ မီးပုံဘေးတွင် ကိုယ်စီကိုယ်ငှ စိတ်ဝင်စားရာ ကစားနည်းများဖြင့် ပျော်ရွှင်စည်ကားနေခိုက် Tom က သူ၏ နာမည်အကြီးဆုံး ကစားနည်းဖြစ်သော လက်ချောင်းလေးများပူးကာကြိုးချည်နှောင်သော ကစားနည်းဖြင့် ကစားပြကာ၊ သင်ကြားပေးရင်းဖြင့်  အန်န်နီ့စိတ်များကို ပျော်ရွှင်လှုပ်ရှားစေခဲ့သည်။ ထိုကစားနည်းဖြင့် Tom နှင့် အန်န်နီတို့၏ လက်ကလေးများ တွယ်ယှက်ချည်နှောင် ကစားခဲ့ကြသည်။ ကစားနည်းကို အန်န်နီလေ့ကျင့်၍ မတတ်မြောက်သေးသော်လည်း Tom ၏ကိုယ်ပွားအမှတ်တရအဖြစ်အကျီ်အိတ်လေးထဲအသာထည့်ကာ သိမ်းဆည်းထားခဲ့သည်။

ဧည့်သည်များပြန်သွားသောအခါ အိပ်ချင်ဟန်ပြုနေသော ဂရေ့စ်နားအသာကပ်သွားခဲ့သည်။ ထို့နောက် မြင်းစီးသည့်ကိစ္စအားမေးမြန်းခဲ့သော်လည်း ဂရေ့စ်က သူမအား အိပ်ခန်းတွင်းမှ ထွက်သွားဖို့သာအော်ဟစ် မောင်းထုတ်ခဲ့သည်။ ထို့ကြောင့် စိတ်ထိခိုက်မှုနှင့် ထွက်ခွာသွားခိုက် ဂရေ့စ်ပြောလိုက်သော စကားတစ်ခွန်းက သူမအား ဂရေ့စ် ဆီသို့ပြန်လှည့်လာစေခဲ့သည်။ သမီးကို ဘယ်သူကမှ အလိုမရှိတာ ပစ်ထားလိုက်ပါ ဟူသောစကားကပင် သမီးဖြစ်သူအပေါ် မိခင်မေတ္တာကို ပီပီပြင်ပြင် ယုယစွာမပြသခဲ့သော သူမအတွက် နင့်သည်းလှသော စိတ်မကောင်းခြင်းကို ဖြစ်စေခဲ့သည်။ ထို့နောက် သမီးထံသို့ ပြန်လှည့်သွားက နွေးထွေးသောထွေးပွေ့ခြင်းများဖြင့် သမီးငယ်အား နှစ်သိမ့်ခဲ့သည်။ ထို့နောက်တော့ သားအမိ၂ယောက် တယောက်ကို တယောက်တင်းကြပ်စွာ ဖက်တွယ်ကာ အားရအောင် ရင်ဖွင့်ငိုကြွေးအပြီးတွင်တော့ သူမတို့ ၂ဦးကြားတွင် ပြတ်တောက်နေခဲ့သော ကြိုးလေး ပြန်ဆက်သွားခဲ့သည်။

(၈)

သမီးကို ဖက်ကာ အိပ်ပျော်သွားသော အန်န်နီ ညဥ့်လယ်တွင် ရေဆာသောကြောင့် နိုးထလာခဲ့သည်။ အိမ်နှင့်အတန်ငယ်လှမ်းသော မြစ်ကြောင်းတလျှောက် လျှောက်သွားပြီး ရေသောက်နိုင်သော နေရာအရောက်တွင်တော့ လက်ခုပ်လေးထဲရေထည့်ကာ သောက်လိုက်သည်။ ထိုစဉ်သူမအနီးသို့ လူတစ်ယောက် ရောက်လာခဲ့သည်။ ထိုသူကတော့ Tom။ 

အန်န်နီက သူမနှင့်ဂရေ့စ်တို့ ယခုတည်းခိုနေသော အိမ်လေးအမည်က ဘာကြောင့်များ R & B ဖြစ်နေရပါသနည်းဟုမေးခဲ့သည်။ ထိုအခါ Tom က B ဆိုသည်မှာ Booker ကို ကိုယ်စားပြုကြောင်းနှင့် R ဆိုသည်မှာ Rachel ကို ကိုယ်စားပြုကြောင်း၊ သူတို့အိမ်ထောင်ဦးကာလများမှာ နေထိုင်ခဲ့ခြင်းဖြစ်ကြောင်းပြောပြခဲ့သည်။ အန်န်နီကလည်း သူ့ဘ၀တစ်စိတ်တဒေသကို ပြန်ပြောပြခဲ့သည်။ ဂရေ့စ်အတွက် မွေးချင်းမောင်နှမ သူမ မွေးပေးလိုခဲ့ကြောင်း၊ ကြိုးစားခဲ့သော်လည်း အရာမထင်ခဲ့ကြောင်းများလည်း ပြောပြခဲ့၏။ ထိုညက လှည့်ဖျားခဲ့သော ည၏ လရိပ်အောက်တွင် သူတို့ ၂ဦးတစ်ယောက်ကို တစ်ယောက်ချစ်နေမိကြောင်းကို မွတ်သိပ်သောအနမ်းတို့ကို တုံ့ပြန်ဖလှယ်ရင်း ဖွင့်ဟပြဖြစ်ခဲ့သည်။

(၉)

နယူးယောက်တွင် ကျန်နေခဲ့သော အန်န်နီ၏ ခင်ပွန်းသည် ရောဘတ် က နေ့စဉ်နှင့်အမျှ ဇနိးနှင့်သမီးကို လွမ်းဆွတ်တမ်းတ သည်။ နေ့တစ်နေ့၏ အားလပ်ချိန်တိုင်းတွင် သူတို့ ၂ဦး၏ အသံလေးကို ကြားရဖို့သာ တောင့်တကြိုးပမ်းသည်။ သွားလည်ဖို့ကြိုးပမ်းသော်လည်း အလုပ်အလွန်ရှုပ်သော သူ့အဖို့ခက်ခဲလှသည်။ ဒီတစ်ခေါက်တွင်တော့ သွားလည်ဖို့အခွင့်ရလာပြီ ဖြစ်သောကြောင့် ဇနိးဖြစ်သူအား လွမ်းဆွတ်တမ်းတ ပျော်ရွှင်စွာဖြင့် ဖုန်းဆက်ကာ ပြောခဲ့သည်။ သို့သော် အန်န်နီက အေးစက်စွာ တုံ့ပြန်ခဲ့သည်။ ဖခင်ဖြစ်သူ လာမှာကြောင့် ဂရေ့စ်က ပျော်ရွှင်နေလွန်းသလောက် အန်န်နီကတော့ အပျော်များ ပျောက်ဆုံးနေခဲ့၏။ Tom ၏ အကိုမိသားစုကလည်း Disney Land သို့သွားမှာကြောင့် တမိသားစုလုံးပျော်နေကြသည်။ အိမ် ၊ ယာတောနှင့် ဆေးခန်းကို  ထိန်းသိမ်းရင်း ကျန်နေခဲ့မည့် Tom နှင့်  သူ၏ချစ်သူ အန်န်နီတို့ ၂ဦးသာ မပျော်နိုင်ခဲ့။

(၁၀) 

ခင်ပွန်းဖြစ်သူ ရောဘတ်ရောက်လာသောအခါ Tom တို့အိမ်တွင် ညစာဖြင့် တည်ခင်းဧည့်ခံကျွေးမွေးခဲ့သည်။ ထိုတခေါက်တွင်လည်း Tom က ရောဘတ်အား ကြိုးသွယ်ကစားနည်းဖြင့် ဧည့်ခံလိုသောကြောင့် အန်နီ့ထံမှ ကြိုးကိုပြန်တောင်းယူခဲ့သည်။ ထိုကြိုးလေး၏ ရစ်တွယ်နှောင်ငင်နိုင်သော ကစားနည်းကို ခင်ပွန်းဖြစ်သူ သိမည်ကို စိုးရိမ်မိတာကြောင့် ရုပ်ပျက်ဆင်းပျက်ပင် ကြိုးလေးအား ပြန်တောင်းယူခဲ့သည်။ Tom က ရောဘတ်အား ထိုကစားနည်းဖြင့် ဧည့်မခံခဲ့သော်လည်း သူမထံမှ ကြိုးလေးကိုတော့ ပြန်သိမ်းယူသွားခဲ့သည်။

နောက်တစ်နေ့နံက်တွင် ဖခင်ဖြစ်သူရှေ့တွင် မြင်းစီးပြချင်လှသော ဂရေ့စ်က ဂျွန်၏မြင်းပေါ်သို့ကြိုးစားအားတင်းကာတက်ခဲ့သော်လည်းအဆင်မပြေခဲ့။ မသိမသာ ပျက်စီးနေသောခြေထောက်တုလေးတစ်ဖက်က မြင်းပေါ်တက်ဖို့ကြိုးစားတိုင်း  သူမအား နာကျင်စေပြီး အားငယ် စိတ်တိုမှုကို ဖြစ်ပေါ်စေသည်။ ဖခင်က သမီးဖြစ်သူအားပွေ့ချီကာ ဆေးရုံသွားပြသောအခါတွင် ဂရေ့စ်ခြေတုလေးအားမဖြစ်မနေလဲရမည်ဖြစ်သောကြောင့် မိသားစုသုံးဦး နယူးယောက်မြို့သို့ပြန်ကာ ခြေတုလဲလှယ်ရန်အတွက်လေယာဉ်လက်မှတ်ဝယ်ခဲ့သည်။ သို့သော် လေယာဉ်လက်မှတ်က ၂ဦးစာပဲရခဲ့သည်။ သည်တော့ အန်န်နီက သူနေခဲ့ဖို့ နှင့် သားအဖ ၂ဦးသာ နယူးယောက်သို့ပြန်ရန် ပြောဆိုခဲ့သည်။

နောက်နေ့များတွင်တော့ သားအဖ ၂ဦးက နယူးယောက်သို့ပြန်သကဲ့သို့ Tom ၏အကိုမိသားစုကလည်း Disney Land သို့သွားရန် ပျော်ရွှင်စွာဖြင့် ပြင်ဆင်နေကြသည်။ အစီအစဉ်ကတော့ ကျန်ရစ်ခဲ့သော Tom ကဆေးခန်းတွင် အချိန်ပြည့်ထိုင်ရန် ဆေးခန်းရှိရာမြို့လေးသို့သွားပေလိမ့်မည်။ အန်န်နီ ကတော့ အိမ်လေးမှာ ဂရေ့စ် တို့ပြန်အလာကို စောင့်ရင်းကျန်ခဲ့ပေလိမ့်မည်။ Tom တို့၏ ၀န်ထမ်းတစ်ယောက်ဖြစ်သော Smokyက မနက်တိုင်း Tom တို့မွေးမြူထားသော တိရိစ္ဆာန်လေးများကို အစာကျွေးရန် လာပေလိမ့်မည်။

အတွေးများနှင့် အန်န်နီတစ်ယောက် တော်တော်နှင့် အိပ်မပျော်။ မနက်လင်းအားကြီးချိန်တွင် သူမတို့တည်းခိုရာအ်ိမ်လေးသို့ ကားတစ်စီးထိုးရပ်လာသံကြားရသည်။ အံ့သြ၀မ်းသာမှုနှင့် သူမရင်တို့ သိမ့်သိမ့်ခုန်သွားသည်။ 

သူ….သူများလား။

ဤ အခန်းကို ဖတ်ရသော အခါတွင်  Tom ကို သူ၏ အကိုမိသားစုနှင့် ခရီးထွက်ရာကို လိုက်သွားစေလိုလှသည်။ သူ့အားတွယ်ငြိနေသော အန်န်နီ အားလည်း မပေါင်းစည်းနိုင်မယ့်အတူတူ ချစ်ဝေဒနာမတိုးစေလို။ ထို့အတူ စာဖတ်ရင်း ကျွန်မလေးစားခဲ့ရသော Tom အားလည်း အမှားမကျူးလွန်စေလို။ ၂ဦးထဲသာ ကျန်ရှိနေမည့်အဖြစ်က တစ်ဦးကို တစ်ဦး ငြိတွယ်နေကြသူများအတွက် အမှားကို မကျူးလွန်မိအောင် ထိန်းသိမ်းသည် ဆိုဦးတော့…အာရုံစေစားရာက ဤ၀န်းကျင်တွင်သာ ၀ဲလည်နေမည်မို့ သူတို့စိတ်များကတော့ ဖောက်ပြန်နေကြပေလိမ့်မည်။ ဇနီးဖြစ်သူနှင့် ရာသက်ပန်ကွဲကွာထားသော Tom အနေနှင့်တော့ အကြောင်းမဟုတ်။ လက်ရှိအိမ်ထောင်ရှင် အန်န်နီ  အနေနှင့်တော့ မိမိအပေါ်ချစ်ခင်လွန်းသော ခင်ပွန်းနှင့် ဒုက္ခိတအဖြစ် ဘ၀ကို နာကျည်းချက်ပြည့်နေသော သမီးတို့ကို ငဲ့ညှာသင့်ပေသေးသည်။ သို့ပေသည့် ကျွန်မဆန္ဒများ ပြည့်ဝမလာခဲ့ပေ။

Tom က ကားပေါ်မှ ဆင်းလာပြီး သူ့ဆေးခန်းကို သွားတော့မှာဖြစ်လို့ လာနှုတ်ဆက်တာဖြစ်ကြောင်း၊ တစ်ယောက်ထဲကျန်ခဲ့ချိန်မှာ ဂရုစိုက်ဖို့အကြောင်း၊ တိရိစ္ဆာန်လေးများကို အစာကျွေးရန်တော့ ၀န်ထမ်းတစ်ယောက်လာမည်ဖြစ်ကြောင်း နှုတ်ဆက်ခိုက် သူတို့၂ဦးရဲ့ အကြည့်တို့ အချိန်ကြာကြာ စုံမိကြသည်။ ထို့နောက်တော့ Tom လည်း ရပ်ထားသော ကားပေါ်တက်၍ မောင်းထွက်သွားသည်ကို အန်န်နီ က မျက်စိတဆုံးကြည့်ရင်းကျန်ခဲ့သည်။

ဘာပဲဖြစ်ဖြစ် တစိတ်တပိုင်းတော့ ကျွန်မစိတ်ချသွားမိသည်။ သို့ပေမယ့် ကျွန်မစိတ်ချမှုများက ကြာရှည်မခံခဲ့။ ပြန်မလှည့်နဲ့ Tom လို့ ကျွန်မ ဟစ်အော် တားဆီးလိုက်ချင်ပေမယ့် အထမမြောက်ခဲ့။ ကားမောင်းရင်း လမ်းတလျှောက် Tom တွေးသွားခဲ့သည်က အန်န်နီ နှင့် နှုတ်ဆက်လာရက်နဲ့များ ဘာကြောင့် သူမကိုမပွေ့ဖက် နှစ်သိမ့်မှု မပေးခဲ့မိသနည်းရယ်ဟု။ သူ၏ အတွေးတို့ကို ထိန်းမရသည့်အဆုံး ကားကိုလာလမ်းအတိုင်း ပြန်လှည့်ခဲ့သည်။ ပြန်လှည့်လာတဲ့သူ့ကို ကြည့်ရင်း အန်န်နီ ကလည်း ကြည်နူးဝမ်းသာမှုများနှင့် ပြေးဖက်ကြိုဆိုခဲ့သည်။ ထို့နောက်တော့ မရည်ရွယ်ထားပါဘဲ Tom၏ အိမ်တွင် ၂ယောက်သား တိုင်းပြည်တစ်ခုကို တည်ထောင်မိကြတော့သည်။

ထိုအခိုက်မြင်းများနှင့် တခြားတိရိစ္ဆာန်လေးတွေကို အစာလာကျွေးသူ Smoky ရဲ့ ကားဝင်လာသံကြားတော့ Tom က ကဗျာကယာ အိမ်အောက်ကို ဆင်းပြီး ခရီးဦးကြိုပြုခဲ့သည်။ ထိုသူကလည်း အိမ်ရှေ့မှာ ထိုးရပ်ထားသော Tom နှင့် အန်န်နီ တို့၏ ကားများကို ကြည့်ပြီး ဧည့်သည် အန်န်နီ သူ့ဌာနေကို မပြန်သေးဘူးလားလို့ သိလိုစိတ်နှင့် မေးခဲ့သည်။ Tom က အန်န်နီ မပြန်သေးကြောင်းနှင့် သူဆေးခန်းကို မသွားဖြစ်ဘဲ ဒီကိုပြန်လာဖြစ်တဲ့အကြောင်းကို မည်သူ့ကိုမျှ မပြောဖို့ တားမြစ်ကတိဆိုခဲ့သည်။

နောက်တနေ့မှာတော အန်န်နီ ရဲ့ဆန္ဒအရ သူတို့၂ဦး လှည့်ဖျားတတ်သော ညတစ်ညတွင် ပထမဆုံး အနမ်းချင်း ဖလှယ်ခဲ့ဖူးသော နေရာလေးဆီသို့ မြင်းစီးထွက်ခွာ သွားခဲ့ကြသည်။ Tom ၏အကိုမိသားစု ခရီးထွက်နေခဲ့သော ရက်များက သူတို့ ၂ဦးကမ္ဘာအတွက် မေ့မရနိုင်တဲ့ နေ့လေးများ ဖြစ်နေခဲ့ပါသည်။

(၁၁)

Tom ၏အကို မိသားစုနှင့် ဂရေ့စ် တို့ သူတို့ အိမ်ဂေဟာလေးသုို့ပြန်ရောက်လာသော အချိန်တွင်တော့ Pilgrim ကို စတင်စီးနင်းဖို့ ဂရေ့စ် ကို Tom ကတောင်းဆိုခဲ့ပါသည်။ ဂရေ့စ် ၏ စိတ်ရင်း အမှန်ကတော့ Pilgrim ကို မစီးလိုတော့ပါ။ သို့ပေမယ့် သူမက Pilgrimနှင့် ရင်းနှီး ကျွမ်းဝင်မှုကိုလည်းပြန်လိုချင်သေးသည်ပင်။ ဒါကြောင့် Pilgrim ၏ကျောပေါ်သို့တက်ရန် သူမကြိုးစားခဲ့သည်။ Tom ကလည်း တက်ရောက်နိုင်ဖို့ ကူညီပွေ့တင်ပေးခဲ့ပါသည်။ သို့သော် Pilgrim က အနည်းငယ် ယဉ်ကျေးလာသော် လည်း  Tom ကလွဲလို့ မည်သူ့ကိုမှ အကပ်မခံခဲ့သူ ဖြစ်တာကြောင့် ဂရေ့စ်ကို အတက်မခံဘဲ ခါချဖို့သာ ကြိုးစားနေခဲ့ပါသည်။

နောက်ဆုံးတွင် Tom က “ကဲ…ငါက သူ့ကို အနုနည်း နဲ့ ယဉ်ကျေးစေခဲ့တယ် ဒါပေမယ့် သူက လက်မခံလိုခဲ့ဘူး။ ဒီတော့ သူလက်ခံနိုင်ဖို့ နောက်ဆုံးနည်းကိုပဲ ငါကျင့်သုံးရတော့မယ်” လို့ဆိုပြီး သူ၏၀န်ထမ်းတစ်ဦးကို ခေါ်လိုက်သည်။ ထို့နောက်တော့ Pilgrim ကို လည်စပ်မှ ကြိုးချည်လိုက်ပြီး သူပြေးနိုင်သလောက် နောက်ပိတ်ဆုံး လုံးဝအမော ဆို့သွားပြီးမြေပေါ်ကို ခေါင်းငိုက်စိုက်ကျသည်ထိပြေးခိုင်းစေသော နည်းကို အသုံးပြုခဲ့သည်။ သေအံ့မူးမူးဖြစ်အောင် မောလျနေတဲ့ Pilgrim ရဲ့ဖြစ်အင်ကို မြင်ရတဲ့  ဂရေ့စ် နှင့် အန်န်နီတို့ ဟာ Tom ကို ရက်စက်လှချည်ရဲ့ ။ ဘာကြောင့်များ သူတို့ရဲ့မြင်းကြီးအပေါ် ရက်စက်ရတာလည်းဆိုတဲ့ အကြည့်မျိုးနဲ့ကြည့်ကြပြီး စကားတို့ ဆွံ့အကုန်သကဲ့သို့ Pilgrim ရဲ့ဖြစ်အင်ကို မမြင်ရက် မကြည့်ရက်အောင်ပဲဖြစ်ခဲ့ရပါသည်။

(၁၂)

မြေပြင်မှာ ဗုံးဗုံးလဲပြီး ခေါင်းစိုက်ကျကာ မျှော်လင့်ချက်မဲ့နေသော Pilgrim ၏ခန္ဓာကိုယ်ပေါ်ကို တက်လျှောက် ၊ တက်ထိုင်စေဖို့ ဂရေ့စ် ကို ခိုင်းခဲ့တဲ့အခါမှာတော့ သူမရဲ့ ၀မ်းနည်းမှုနှင့် Pilgrim အပေါ်သနားမိသော ဂရုဏာဒေါသောတို့ဟာ အထွတ်အထိပ်ကိုရောက်သွားပြီး မလုပ်နိုင်ကြောင်းငြင်းဆန်ခဲ့သည်။ Tom က ဂရေ့စ် နဲ့ အန်န်နီ ကိုလုံးဝလှည့်မကြည့်ဘဲ ခတ်ဆတ်ဆတ်နဲ့ “ငါတက်လို့ ပြောလိုက်ရင် တက်လိုက်ပါ။ Pilgrim ကို  အသက်ရှင်နေရင်းနဲ့ ငြိမ်းချမ်းမယ့် လမ်းကို ငါက ရွေးချယ်ခိုင်းပေမယ့် သူငြင်းဆန်ခဲ့တယ်။ သူဟာ ဘ၀ရဲ့အဆုံးကို သွားကြည့်ဖို့လမ်းကို သူ့ဖာသာ ရွေးချယ်ခဲ့တယ်။ အဲဒီ့ဘ၀ရဲ့အဆုံးမှာ ဘာတွေရှိသလည်း ဆိုတာကို သူခုသိသွားခဲ့ပြီ။ ဒါကြောင့် သူဟာငြိမ်းချမ်းစွာနဲ့ ခုလက်ရှိဘ၀ကိုပြန်လာဖို့ ရွေးချယ်လိုက်ပြီ။ သူရွေးချယ်ခဲ့ဖူးတဲ့ ဘ၀ရဲ့အဆုံးလမ်းဟာ ဘယ်လောက်တောင် ခက်ခဲကြမ်းတမ်းသလည်းဆိုတာ သိဖို့လိုနေသေးတယ်။ ဒါကြောင့်တက်ခိုင်းတာ။ ပြီးရင် ခုလက်ရှိဘ၀ကို အသာတကြည်ပဲ ပြန်လက်ခံလိမ့်မယ်။”

သေချာရဲ့လား ဆိုတဲ့ ဂရေ့စ် ရဲ့အမေးကို သူက ခေါင်းဆတ်အဖြေပေးခဲ့တော့ ဂရေ့စ် က အန်န်နီ နှင့် Tom တို့ကို အားပြုပြီး ပြိုလဲကျနေတဲ့ Pilgrim ရဲ့ကိုယ်ပေါ်ကို တက်လျှောက်ခဲ့သည်။ ပြုသမျှ နုရတော့မယ့် အခြေအနေမှာ ရှိနေသူ Pilgrim ကတော့ အောက်မှ နာကျင်စွာ ခံစားနေရုံသာ။ ထို့နောက် Tom က Pilgrim ကို ရေသောက်ရန်နေရာရှိသော ၀င်းခြံထောင့်သို့ ဂရေ့စ် ကိုဆွဲခေါ်သွားစေခဲ့သည်။ ရေသောက်ပြီးနောက် အမောပြေသွားသော အခါတွင်တော့ Pilgrim အပြောင်းလဲကြီးပြောင်းလဲသွားခဲ့သည်။ သူ၏လက်ရှိဘ၀ကိုပြန်လက်ခံကာ ဂရေ့စ်အား ပြန်လည်လက်ခံခဲ့သည်။ ထို့ကြောင့် ဂရေ့စ်နှင့် သူမ၏ မြင်းကြီးတို့သည် အရင်လို တသားတည်းပြန်ဖြစ်သွားသောကြောင့် မိသားစုဝင်များ အားလုံးပျော်ရွှင်ခဲ့ရသည်။

(၁၃)

လာရင်း ရည်ရွယ်ချက်ဖြစ်သော Pilgrim ကို ပကတိ အခြေအနေရောက်အောင် ပြန်လည်ကုသပေးပြီးဖြစ်၍ Pilgrim ၏ အခြေအနေသည်လည်း စိတ်ချရပေပြီ။ သည်တော့ ဂရေ့စ် တို့သားအမိ  ၂ဦးနှင့် Pilgrim တို့ ပြန်ကြဖို့သာ ရှိတော့သည်။ မိုင် ၃၀၀၀ ကျော်ဝေးသော ခရီးကို ကားမောင်း ပြန်ကြရမည့် သားအမိ ၂ဦးအတွက် Tom ၏ အကို Frunk မိသားစုက ပါတီညစာစားပွဲလေး လုပ်ပေးခဲ့သည်။ ညစာစားပွဲ အချိန်အတွင်း အန်န်နီက Tom ကို ပြောစရာရှိ၍ မြင်းဇောင်း နောက်သို့ လာခဲ့စေချင်ကြောင်း ပြောပြီး သူမ၏ ခံစားချက် နှင့် အစီအစဉ်များကို ရင်ဖွင့်ခဲ့သည်။

“Tom.. ကျွန်မ Robert (ဂရေ့စ် တို့ အဖေ) ကို ထားခဲ့မယ်။ ပြီးတော့ ကျွန်မ ရှင်နဲ့ မခွဲချင်ဘူးရှင်ရယ်။ ဒီတော့ ကျွန်မတို့ လက်ထပ်ပြီး အတူနေကြစို့”

ထိုသို့ ဆိုခဲ့သော စကားကို Tom ကလက်သင့်မခံခဲ့။ နာကျင်ခဲ့ဖူးသော ဂရေ့စ် ကို စာနာရန်လိုအပ်ကြောင်း နှင့် ထိုကဲ့သို့မကြံသင့်ကြောင်း ဖျောင်းဖြ ပြောဆိုခဲ့တော့ အန်န်နီ တစ်ယောက် သူ့ကို Tom တကယ် မချစ်ဟု အထင်ရောက်သွားခဲ့သည်။ Tom မျက်နှာကို စေ့စေ့ကြည့်လို့

“ရှင်…ကျွန်မကို တကယ်ပဲခွဲနိုင်သလား” လို့ မေးခဲ့သည်။

“ကိုယ် မင်းကို မခွဲနိုင်ဘူး။ ဒါပေမယ့် ခွဲရမယ်” လို့ တစ်လုံးချင်း ပြောလိုက်တဲ့ Tom ရဲ့စကားအဆုံးမှာ ၂ဦးသား တင်းကျပ်စွာ ဖက်ထားမိပြန်သည်။

“Tom ..ရှင်…Pilgrim ရဲ့အကြောင်းကို ပြောတုန်းက စကားလေးကို မှတ်မိလား၊ သူဟာ ဘ၀ရဲ့ အဆုံးကို သွားဖို့ရွေးချယ်ခဲ့တယ်။ နောက်တော့ အားလုံးကို ကျော်လွှားပြီးခဲ့တဲ့အခါ နာကျင်ခဲ့ရတဲ့ ဘ၀ရဲ့ အဆုံးကိုစွန့်လို့ သူ့လက်ရှိဘ၀ကိုပဲ လက်ခံလိုက်ဖို့ ပြောင်းလည်းခဲ့တယ်လို့ ရှင်ပြောခဲ့တယ်လေ။ ”

“Annie တကယ်လို့ ကိုယ်တို့ရွေးချယ်လက်ခံလိုက်တဲ့ ဘ၀မှာ နာကျင်စရာတွေ ရှိနေခဲ့ရင်…မင်းအဲ့ဒီ့ဘ၀ကို လက်ခံလိုက်ဖို့ ရဲဝံ့ မိုက်ရူးရဲ ဆန်တော့မှာမဟုတ်ဘူး။ ဒါပေမယ့် သေချာတာက အဲ့လို နာကျင်ခံစားရမှာ မင်းနဲ့ငါ မဟုတ်ဘူး။ အခြားသူတွေ။ ဂရေ့စ် နဲ့ ရောဘတ်”

Tom စကားအဆုံးမှာတော့ အန်န်နီ အရမ်းစိတ်ဆိုးသွားခဲ့သည်။

“ရှင် ကျွန်မကို မလိုချင်လို့ ပြောနေခဲ့တာ မဟုတ်လား Tom ” လို့ ဒေါသတကြီးနဲ့ ပြောဆိုခဲ့တယ်။ Tom ကလည်း “မင်းကို ငါဘယ်လောက်ထိ ချစ်ခဲ့တယ်ဆိုတာ မင်းဘယ်တော့မှ သိမှာမဟုတ်ဘူး အန်န်နီ” လို့ ပြောပြီးနောက်မှာ ဒေါသနဲ့ ၀မ်းနည်းမှုစွတ်ဖက်တဲ့ အန်န်နီ တစ်ယောက် ငိုယိုပြီး ပါတီပွဲကို ပြန်ထွက်ပြေးသွားခဲ့သည်။ ဖြစ်ချင်တော့ ထိုညစာစားပွဲတွင် Smoky က Tom နှင် အန်န်နီတို့ Frunk မိသားစု ခရီးသွားနေစဉ် အတူရှိနေခဲ့ကြကြောင်း Frunk ၏ ဇနီးကို ပြန်ပြောပြခဲ့၏်။ အရက်မူးလွန်နေသော Frunk ၏ ဇနီးက Frunk ကို ထိုအကြောင်းတွေ ပြန်ပြောခဲ့ရာ၊ ဂရေ့စ်က ကြားသွားခဲ့ပြီး နောက်နေ့ မနက်လင်းချိန်တွင်တော့ ဂရေ့စ်နဲ့ သူမရဲ့အချစ်တော်မြင်းကြီး Pilgrim တို့ပျောက်ဆုံးနေကြောင်း  သူတို့အားလုံး သိခဲ့ကြရသည်။

(၁၄)

 စိုးရိမ် ပူဆွေးနေသော အန်န်နီကို နှစ်သိမ့်ပြီး Frunk နှင့် Tom တို့ညီအကို ၂ဦး ဂရေ့စ် တို့ ကိုရှာဖို့ တောထဲကို ထွက်ခဲ့သည်။ အချိန်အတော်ကြာ ရှာပြီးနောက်မှာ ဂရေ့စ် နှင့် Pilgrim တို့ကို မြင်းရိုင်းတို့၏အလယ်တွင် မျက်စိသူငယ်လေးတွေနှင့် တွေ့ခဲ့ရသည်။ အကြောက်လွန်နေရှာကာာ ခုခံဖို့ မစွမ်းသာတာ မြင်ရတဲ့အခါမှာတော့ Tom ဟာ ဆုံးဖြတ်ချက် ချလိုက်ပြီး သူတို့အပေါ်ကျရောက်နေသော မြင်းရိုင်း၏ ဒေါသကို သူ့အပေါ်အာရုံပြောင်းသွားစေရန် ဆောင်ရွက်ခဲ့ပြီး ဂရေ့စ်နှင့်  Pilgrim တို့ရဲ့အသက်ကို ကာကွယ်ပေးခဲ့သည်။ အဲ့ဒီ့ခဏအတွင်းမှာပဲ..Tom ဟာ မြင်းရိုင်းရှေ့ကို မိုက်ရူးရဲစွာပဲ တိုးဝင်သွားခဲ့ပြီး သူ့ ရင်ဝကို မြင်းရိုင်း၏ ခွာကြမ်းအောက်မှာ အကန်ခံရစေခဲ့ပြီး သေဆုံးသွားခြင်းဆိုတဲ့ လမ်းကို သူရွေးချယ်သွားခဲ့သည်။

(၁၅)

ဇာတ်သိမ်းပိုင်း

Tom သေဆုံးပြီးနောက် နယူးယောက်မြို့က ဂရေ့စ် တို့အိမ်လေးတွင် ၁နှစ် မပြည့်ခင် ၃လစောပြီး အန်န်နီ ကသားယောက်ျားလေးတစ်ဦး ဖွားမြင်ခဲ့၏။ မောင်လေးတစ်ဦးရလာခြင်းအတွက် ဂရေ့စ် ကပျော်ရွှင်ခဲ့ပေမယ့် ကလေးဖခင် ဘယ်သူဆိုတာကို ဂရေ့စ်ရော ရောဘတ်ပါ သိဖို့မကြိုးစားကြ။ ရောဘတ် ကလည်း သူ့ကလေးဖြစ်သည် ဟုသာ ယုံကြည်ချင်တာမို့ မေးဖို့ကြိုးစားရန်မလိုဟု ခံယူထားခဲ့သည်။ 

သူမဘ၀ကို ဆက်လက်ရှင်သန်လိုသေးတဲ့ ဂရေ့စ်ကလည်း Pilgrim လိုသာ ကျင့်တော့မည်ဟု ခံယူလိုက်သည်။ ခုဆိုသူမလည်း အရွယ်ရောက်လာပြီလေ။ ကျောင်းပြန်တက်ဖို့ ကြိုးစားသည်။ သူမ ကျောင်းစာတွေ လိုက်နိုင်ဖို့ ကျောင်းနေဖက်ဟောင်းတွေက ကူညီပေးခဲ့သည်။ စန္ဒယားတီး သင်တန်းကိုလည်း အရင်လိုပဲပြန်တက်ခဲ့၏။ အန်န်နီ မွေးထားတဲ့ သားကလေးဟာ အချိန်များစွာမှာ သူ့အမေ သူ့အတွက် နို့ဘူးဖျော်နေတာတွေ ဟိုသည်သွားတာတွေကို မျက်လုံးလေး ၀ိုင်းစက်လို့ လိုက်ကြည့်နေတတ်လေ့ရှိသည်။

တခုသော နံနက်ခင်းမှာတော့ Frank ဆီက စာအိပ်လေးတစ်စောင် ကို အန်န်နီလက်ခံရရှိခဲ့သည်။ စာအိပ်ပေါ်တွင် Tom လက်ရေနှင့် ရေးထားသော အန်န်နီ့ အမည်လေးပါရှိသည် ။ အန်န်နီ စိတ်လှုပ်ရှားစွာဖြင့် စာအိတ်လေးကို ဖွင့်ကြည့်လိုက်တော့ သူ့ကို နောက်မှပြန်ပေးမယ်လို့ဆိုပြီး Tom ပြန်သိမ်းသွားခဲ့တဲ့ သူမ နှင့် Tom ၏လက်တို့ ချည်နှောင်ဖူးတဲ့ ကြိုးကွင်းလေး နဲ့ စာရွက်လေးတစ်ရွက်။ စာရွက်လေးမှာ ရေးထားတာက ”ဘယ်တော့မှ မမေ့ဘူး….” တဲ့။

။~~~~~~~~~~~~~~~~~~~~~~~~~~~။

ကျွန်မ ဤစာအုပ်လေးကို ဖတ်ခဲ့ဖူးသည်မှာ အချိန်ကာလ အတော်ကြာခဲ့ပါပြီ။ စကားလုံးအားလုံးကို လုံးစေ့ပတ်စေ့ပြန်မမှတ်မိနိုင်ခဲ့ပေမယ့် အဖြစ်အပျက်တို့ကတော့ ကျွန်မ မျက်စိထဲတွင် ရုပ်ရှင် အနှေးပြကွက်အလား။ အိမ်ထောင်တာဝန် ကျေပွန်သော၊ စိတ်ထားနူးညံ့ကာ ရိုင်းပင်းကူညီတတ်သော၊ သူတပါးအသက်ကို ကယ်တင်ခဲ့ကာ မိမိကိုယ်ကို စွန့်လွှတ်အနစ်နာခံတတ်သော Tom ကို ကျွန်မလေးးစားမိသည်။ သူသည် Pilgrim ၏ဘ၀ ဆက်လက်ရှင်သန်ရန် မှအစပြုဆက်စပ်၍ ဂရေ့စ်ကိုပါ ပုံမှန်ဘ၀သို့ပြန်ရောက်အောင် ပြန်လည်အသက်သွင်းပေးနိုင်ခဲ့သည်။ သူ့ကိုယ်သူ အဆုံးသတ်မလှပစွာ စွန့်လွှတ်ခြင်းဖြင့် မိသားစုသုံးဦးဘ၀ကို ပိုနေမြဲကျားနေမြဲလေးအတိုင်း ထိန်းသိမ်းပေးသွားနိုင်ခဲ့သည်။ သို့နှင့် ဤစာအုပ်လေးပါ အကြောင်းအရာများကို ပြန်လည်တွေးတောကာ စာစီမိချင်လာသည်။

Pilgrim ၏ အဖြစ်အပျက်လေးမှ ကျွန်မ သင်ခန်းစာယူလိုက်မိသည်က ကျွန်မတို့ လူသားများသည်လည်း တခါတရံ သေဖူးမှ ဘ၀ရဲ့ တန်ဖိုးကို နားလည်တတ်ခဲ့ကြသည်။လွယ်ကူချောမွေ့နေသော ဘ၀တွင် နေခဲ့ရစဉ်က ဘ၀၏ တန်ဖိုးကို နားမလည်ခဲ့။ အရာရာ လိုတ ရနေခဲ့လျှင် ရရှိနေသော အရာတို့ကို တန်ဖိုးမထားချင်ခဲ့။ လက်လွှတ် ဆုံးရှုံးရမည် ဆိုသောအခါမှ၊ ပိုင်ဆိုင်ထားရသော ဘ၀ကို စွန့်ရတော့မည် ဆိုသောအခါမှ အပူတပြင်းနှင့် မိမိလက်ရှိဘ၀ ကိုပြန်မက်မောတတ်ကြသည်။

သြော် သက်ရှိသတ္တ၀ါရယ်လို့ဖြစ်လာမှတော့ ပိုးတုံးလုံးလည်း သူ့ဘ၀ကို ၊ ပုရွက်ဆိတ်၊ တီကောင်လေးများသည်လည်း သူ့ဘ၀ ကိုမြတ်နိုးကြမည်သာ။ ကျွန်မတို့ကို ပုရွက်ဆိတ်လေး တစ်ကောင်လောက် လာကိုက်လိုက်လို့ ခဏတာ ဒေါသနဲ့ သူတို့ကိုကောက်ယူခြွေမွလိုက်လျှင် ဘ၀ကြီးတစ်ခုလုံး ဆုံးရှုံးသွားရသော ပုရွက်ငယ်သည် သူ့ဘ၀တစ်ခုလုံးအတွက် မည်မျှတောင် နာကျင် နှမြောလိုက်မည်နည်း။ ထို့အတူ လက်ရှိရရှိနေသော ဘ၀ကို ဆိုးရွားသည်ဟု တွက်ဆကာ လက်မှိုင်ချ မှိုင်တွေ ဂျစ်တိုက်လို့ အရာရာကို အရှုံးပေး အရွဲ့တိုက်နေလို့ရော ကျွန်မတို့ ဘ၀တွေ နေပျော်ပါမည်လား။ ဖြစ်လာသော ဘ၀ကို သတ္တိရှိရှိနှင့် ကြံ့ခိုင် ရင်ဆိုင်လက်ခံလိုက်ပြီး အကောင်းမွန်ဆုံး အသက်ရှင်သွားဖို့သာ လိုသည် မဟုတ်ပါလား။

Tom သေဆုံးသွားခဲ့တဲ့အခန်းမှာတော့ သူ့အတွက် စိတ်မကောင်းဖြစ်မှုကို ထိန်းမရနိုင်ခဲ့။ သည်စာအုပ်ကို ဖတ်နေသော တလျှောက်လုံး ဇနီးနဲ့သားအပေါ် အလွန်အမင်းချစ်ခင်ကာ အတူနေခဲ့စဉ်တလျှောက် ယောက်ျားကောင်းပီသခဲ့သော Tom အားကျွန်မလေးစားခဲ့သည်။ အန်န်နီက စိတ်ရဲ့အလိုကို လိုက်မိသော ကြောင့် သူမအပေါ်တသက်လုံးကောင်းကာ အရိပ်ကြည့်မြတ်နိုးခဲ့သော ခင်ပွန်းသည်နှင့် စိတ်ဒဏ်ရာ ရနေရှာသော သမီးငယ်ကို ပစ်ကာ Tom နှင့် လက်ထပ်လိုကြောင်းပြောစဉ်အခါက မြန်မာအမြင်နှင့် ကြည့်ကာ ကျွန်မစိတ်ကွက်ခဲ့သည်။ ဤအတွေးမျိုးကို လက်ရှိအိမ်ထောင်ရှင်က တွေးသင့်ပါသည်လား။ အဆင်မပြေသော အိမ်ထောင်ရေးမို့ ၂ဦးသဘောတူ ကွဲကွာထားကြပြီးသားဆိုလျှင်လည်း ရှိစေတော့။ ခုတော့ သူ့အပေါ်သိပ်ကောင်း ပြီး ချစ်လွန်းတဲ့ ခင်ပွန်းသည်ကိုမှ စိတ်ခံစားမှုတစ်ခုအတွက် ပစ်ပယ်ဖို့ရာ စဉ်းစားလေခြင်းရယ်လို့။

ဒါပေမယ့် ကျွန်မလေးစားရသော Tom ကလက်သင့်ခံခြင်းမရှိခဲ့။ သူတို့ ၂ဦးပျော်ရွှင်ဖို့ရန် တခြားလူတွေ နာကျင်ဝမ်းနည်းရမည့်လမ်းကို ရွေးချယ်ခွင့်မပေးခဲ့။ တခြားလူများအတွက် သူတစ်ဦးထဲ နာကျင်ရမည့်လမ်းကိုသာ သူရွေးချယ်သွားခဲ့သည်။ ဤသို့ သုံးသပ်ချက် ချမိတော့ Tom ၏ စိတ်နှင့် သွားတူနေသော ကျွန်မစိတ်ကို ကျွန်မ လွတ်မြောက်ခွင့် ပေးလိုက်ချင်သည်။

ကျွန်မ ချစ်ခင်နှစ်သက်သူများ သံယောဇဉ်ကြီးသူများ၏ စိတ်အလိုကျ စိတ်ချမ်းသာစေဖို့၊ နှစ်သက်ရာလမ်း၊ ရွေးချယ်နိုင်စေဖို့ ၊ တနည်းအားဖြင့် သူတို့ မနာကျင်ရစေဖို့၊ အကြိမ်များစွာ အကြောင်းအရာ များစွာမှာ ကျွန်မ၏ ခံယူချက် ခံစားချက် အားလုံးကို နောက်ဆုတ်ပေးခဲ့သည်။ ကျွန်မသာ စွန့်လွှတ်ပေးခဲ့သည်။ ထိုသို့နောက်ဆုတ် စွန့်လွှတ်ဖို့ ခက်ခဲစွာ ကြိုးစားနေတဲ့ အချိန် အပိုင်းအခြားအတွင်းမှာ ကျွန်မ ဘယ်လောက်တောင် နာကျင်ခံစားရသည်လည်း ကျွန်မသည်သာ အသိဆုံးဖြစ်သည်။

ပျော်ရွှင်နေကြမည်ဖြစ်သော ကျွန်မသံယောဇဉ်ကြီးသူများနှင့် သူတို့ရွေးချယ်ခဲ့သော လမ်းများ၊ အကြောင်းအရာများ၊ ပတ်သက်မှု များက ကျွန်မ ခံစားချက်ကို နားလည်မည်မထင်။ သိကြလိမ့်မည် မထင်။ သူတို့၏ ပျော်ရွှင်မှုများကို အောင်မြင်မှုများဖြင့် တွဲယှက် စားသုံးကြမည်သာ။

Tom ၏ စိတ်ဓာတ်ကို ကျွန်မ လေးစားအလေးပြုမိ၏။ သူတပါး ပျော်ရွှင်စေဖို့ ကိုယ့်ဖက်က စွန့်လွှတ်လိုက်ရတိုင်း ခံစားရသော နာကျင်ဆို့နင့်မှုကို နောကျေစွာ သိနေသူမို့ ကျွန်မ Tom ကိုသနားမိသည်။ သို့ပေမယ့် အဆုံးစွန်သော နာကျင်စွန့်လွှတ်ခြင်းဖြင့် ပေးဆပ်သွားသော Tom ၏ ၀ိဥာဉ်တော့ မပူးကပ်လိုပေ။

စာအုပ်လေးကို ဖတ်ခဲ့စဉ် တုန်းကတော့ အင်္ဂလန်နိုင်ငံသား စာရေးဆရာက သူ၏ဇာတ်လမ်းဇာတ်ကောင်များ ပီပြင်စေရန်အတွက် သူကိုယ်တိုင် နယူးယောက်မြို့သို့သွားရောက်နေထိုင်ကာ ရေးသားခဲ့သော The Horse Whisperer ကိုဖတ်ရှုရန်ကောင်းသော စာအုပ်လေးတစ်အုပ်အဖြစ်သာ သဘောထား၍ ဖတ်ရှုခဲ့ဖူးသည်။ ခုဤစာကို ရေးမိသော အချိန်တွင်တော့ Tom Booker သည် မှတ်ချက်များ ဖြစ်ပေါ်စေရန်အတွက် ကျွန်မကို အတွေးယဉ်ကြောတွင် စီးမြောသွားစေခဲ့ပါသည်။

(ဇာတ်လမ်းအကျဉ်းဖြစ်စေရန်ဆီလျော်အောင်ရေးသားရာတွင် ဘာသာပြန်လွဲမှားမှု နှင့် လိုအပ်ချက်များ ရှိပါက ခွင့်လွှတ်နားလည်ပေးစေလိုပါသည်။)

ကြည်ဖြူပိုင်

၁၆- ၆- ၂၀၁၃

မနက် ၁နာရီ ၁၂ မိနစ်

Read More